Pathian duhzawng ih Nun

Nitin na nun ah, na hnaṭuan nak ah maw, asilole rualpipawl ruangah maw, lungretheihnak, thinharnak, thinlung kekkuainak tla na tawng thei, cutik can ah a phunphun na ruat ṭheu ko ding. Hi vekcan ah a thupibik cu ziang a si ti le, in bawm theitu zo a si timi kan theih a ṭul. In bawm theilotu hnen ih kan sim le kan ṭah khan umzia a nei lo. In bawm theitu Jesu/Pathian a si ti kan theih ding hi a thupi tuk.

Nangmah na sinak vekin Pathian pan mei aw. Pathian hnen ah thinlung kekkuai thawn pan mai aw. Na thinhar le na beidawng ih vansang lam ih na um hlan ai ih ṭhasawn in Pathian in a lo tuamdam ding a si. Tui’hlan ah minung lam sinak in thinhar vansan nak tla kan rak tawng ṭheu ve, mi ih sualpuhnak tivek le a phunphun tla, asinan ka unau la minungpi ka sim ih ruahnak ka dil tikah can reilote cu um a nuam (himi zawn ah ruahnak I petu le thazang I petu pawl ziangah ka siarlo ka tinak a si hrimhrim lo), asinan khua a hung van tikah a bawr le kel ah a cangsal ṭheu.

Hivek can fang ahhin, keimah rori khal ka rak si. Pathian hin I duh lo maw si? Pathian hin I thein awn lo maw si, ziangah saw I ngaihsak lo ke, ziangah saw hivek I tawntir ke tiah Pathian kan vuihram zik pang theu. Hifang hi setan khalin cantha a rak lak laifang a si ve. Curuangah setan thang sung ihsin kan luat ding a thupi.

Miṭhen tla cu Pathian in ziangah hivekin ka parah lai a rel si pei? Tiah thinpit le vansangin khawm paihlo le thlacam paihlo, zumtu nau le kan minungpi pawl hman an hua theu. Hivek laifang ah hin si Pathian kan naih sinsin a thupit tuknak, zumlotupawl tla cu an nunnak tianghman an mahte an la aw mei theu.

Kan nih Zumtupawl in Pathian duhzawng ziang a si timi kan theihfeng ding a thupi tuk. Degree sangsang na neih le, ulenau ṭhaṭha, tlangval ṭha, fala ṭha, inn le Lo tha, na fimthiamnak le na thilti theinak pawl hnakin Pathian in a duhbikmi cu Thinlung Kekkuai thawn a hnen pantu a si sawn. Remṭhat kan ṭul le Pathian in a mai’ lam ih kan hawi a duh ruangah harsatnak maw, thin kekkuainak maw, vansannak kan tawn ṭheumi hi a si. Pathian in rem in duh ruang sawn ah a si theu.

Thinlung kekkuai dah nan um maw? Hnaṭuannak ah maw, rualpi lakah maw hnawn mi maw, asilole pakhat khat ruangah thin beidawng in na um dah maw? mi vanṭha sawn na si, harsatnak kan tawn tam poh le kan nun a cak timi zumtu cun kan fen sinsin a pawimawh.

Harsatnak kan ton hi a san le a vang a um a si. Kan mai’ sual ruangah tla a si thei, Pathian kutcak langnak dingah tla si thei. Ziangruangah harsat kan tuar timi zoh in Pathian duhzawngih kan um/nun ding a thupi tuk.