Thisen le Mitthli, Pu Nothankap ih nganmi

Pu Than in thu tawi tete a ngan mi lak ihsin thutawi pathum, “Ka pa Chinram ka nu Falam“, “Tlu nawn hram hlah Masada“, ti mi le “Dam san,” ti mi hi a siartu hrangah hlawknak a si dah pang ah ti ah a hnuaiah ngan a si.

Suakthuan ka si lai ihsin ka atcilh mi pakhat cu kan Chinram zalennak ngah dingih ṭuan a si. Ka kum a hung upa vivo ih 35 ka si ah tling lo cingin hriamhrei kai tiangin Chinram hrangah ṭuannak can ṭha ka nei. 1988 buainak ruangih ram pawn tiangih suak Falam mino lawng si lo Chin mino tampi (tam sawn ka ti ko ding) thawn thlan, thisen le mitthli luang tiangin kan ṭuan tlang.

Newin san ihsin kum 26 leng lo Mit le Hna phihsak mi Chin tlawngtapawl lungput ka hmuh tikah ka mang a bang.

Pakhatnakah, an thazang cahnak le an thinlung zate pe ngam in ram hrangih an ṭuan duhnak lungthin khohkhah zet ka hmuh tikah ka rak ruahnak hnakin mi tumruh le pekawknak sang nei an si ti ka hmuh ruangah ka mang a bang.

Pahnihnakah, Chinram zalennak hrang hnakin Kawlram pumpi ih democracy ngahnak ding hrangih ṭuan duh an tam sawn ti ka hmuh ruangah ka mang a bang.

Pathumnakah, mino tam sawn cu College tlawngta an sinan, rampi ukawkdan (constitution) siseh, ram thuanthu (world history) siseh an thei lo tukih ka mang a bang.

Palitnakah, pathian fate tlukin keimah in zoh sang kha ka mang bang. Tui ni ah, khalai ih keimai lungput ka zohsal tikah mangbang mi ka nei.

Pakhatnakah, keimai suahkehnak Falam peng le Falam mi tanta tiang in Chinram pumpi hrang ka zoh tuk mi kha ka mang bang, ṭhimnakah keimah sangtu ah siseh, ralkap hotubik ah siseh, party GS ah siseh thinlung kauzet nei in peng dang mi hlir (Chinmi an si pam tiin) ka ret thluh. Kum 4 hnulam lawngah ka palhzia a lang (Hruaitu ropibik Lal Jesu tuahdan ka rak cawng thiam lo: Judah hrin hnuah leitlun ti mi).

Pahnihnakah, mi ih faknak, upatnak le sunlawihnak kha kumkhaw daih si ding vek ih ka rak ruat kha ka mang a bang, ziangahtile tui ni ih kan fehnak ding lamzin parih an puan sin lai hman phahtu, “Hosna..hosna!” tiih au rerotu cu thaisun ih “Khengbet uh, kheng that uh” tiih in autu ding an si thei ti ka rak ruat ban lo (Hruaitu ropi Jesu ih nun ka rak zir thiam lo).

Pathumnakah, Chinmipawl cu Pupa san ihsin hrin lungput (tribalism/clanism/communal feeling) nei tuk kan siih tui mino san khalah cui khawruahnak a thi hrih lo ti ka rak ruah ban lo tlunah keimah in cuvek thinlung ka neih lo vekin midang in an nei ve lo ding tiih ka ruat mi kha ka mang bang, ziangahtile a takah ka rak ruah vek a si lo.

Tu ah lungawizetnak ka nei:

Pakhatnakah, Kawlram ih democracy ngahnak ding lawngih pumpe aw Chin mino tampi hnenah Chinram hrangah ṭuannak cang thiam dingin thlaici ka tuh ngah ruangah le cui ci tuh mi cu a nung ringring lai ti ka hmuh ruangah ka lung a kim (ṭhimnakah CNF/CNA: Ka um lo hnuah i dodaltu si hman hai sehla).