Rakhine Ramkulh Thantar Tartu Tam Sinsin

Rakhine ramkulh acozah in Rakhine ramkulh thantar tartu inn pawl cazin la dingin le ramkulh thantar tar nawn lo dingin theihternak a tuah hnu Rakhine ramkulh sungah ramkulh thantar tartu an pung sinsin tiah theih a si. Khua hrekkhat ahcun ramkulh thantar thlir tahratin an khua kimvel khal velsuak in lamzawh cangvaihnak an neih thu khal khuami pawlin an sim.

Rakhine ramkulh thantar inn hmai ih an tar ruangah Sittwe khawpi Minkan veng telin palik pawl le veng hotu pawl cu vengtin ah feh in March 23 zing ah thantar tar nawn lo dingin a kham thu theih a si.

“Asi, tlunlam ihsin ca a thlen ruangah palik le veng hotu pawl telin mani zing ah ra tahratin in ra kham, thaizing khua a van hnu khalah kan lo kham sal ding tiah an ti, nan bal duh lo asile pukmah 121 in zung thlen nan si ding tiah inn zakhat hotu in i sim ta” tiah Minkan khuanu khuapa pakhat in a sim.

Hi thuhla thawn pehparin Minkan veng hotu U Kyaw Thar in “asi, kannih in kan baltermi cu a si lo, ramkulh acozah ihsin ca thleng a um, cutiih ca thleng a um ruangah kan simmi men a si, bal duh lo asile pukmah 121 in buainak a suak thei, ramkulh acozah ihsin ca suahmi a um, curuangah nanmahten rak bal men uh, culo asile thubuai a thleng thei tiah palik pawl thawn kan sim, annih cun thubuai thawn pehpar-awk ding a si ahcun bal dingin an rel” tiah simnak a nei.

Thantar balter ding thuhla thawn pehparin Minkan palik zung cu thusuh a siih police lieutenant Kyaw Moe in “ka tlunlam ih upa pawl sut uh” tiah a let.

2019 March 14 ih Rakhine ramkulh acozah ih tuahmi thuretcatmi nambat 9/2019 bangtukin Rakhine ramkulh thantar tarmi bal ding le bal lo asile pukmah 121 in thubuai a thlen thei thu daan vekih sim dingin le bal dingih thutiamnak hmin khen ding thu palik le pengpi, peng hotu hnenah Rakhine ramkulh chief minister ai-awh in ramri tlangbawi in theihternak a tuah. Ref : NRJR