Thuthang Diklo ih suah ruangah MNF cun Vanglaini a khing tum; Video

Tufang Mizoram ih by-election an neihnak ah Mizoram sungih Thuthang ca tumbik le larbik a simi Vanglaini Thuthangca cun tufang acozah dinglai, MNF, symbol (hminsinnak) cu Ni a si, tiah diklo takin an suahmi thuhla ah MNF president asimi le tufang Mizoram Chief Minister Pu Zoramthanga cun khin an tum thu a sim.

MNF timi cu Mizo National Front ti a si ih Mizoram federal state an ngahnak dingih hmatuangtu hmaisabik an rak si. An party hminsin awknak (symbol) cu Arsi a si. Cumi cu tubaite April 10, 2019 ih Mizoram lailak hrilawknak an neihnak ah Vanglaini Thuthangca cun “MNF symbol cu Ni a si” tiin a rak suah.

Hi thuthawn pehpar in MNF president, tufang Mizoram Chief Minister Pu Zoramthanga cun “MNF hruaitupawl cun mipi lam ihsin phone nasa takin kan dawng ih “nan symbol cu nan thleng maw si? tiah in run sut nasa. Hihi an tisual palh khal a si lo, tihrim mi rori a si. Himi Thuthangca neitu hi Pu K.Sapdanga a si ih ZPM ih an hotupa a si. An Joint Editor khal ZPM ih an candidate asimi Lalhnginglova Hmar a si. Curuangah hihi an tihrimmi, an sualral tuk ruangah a si. Curuangah hihi election commission ah kan complaint hngalh ding a si. MNF symbol cu NI siloin ARSI a si tiin hrilawknak neih lai ah akhat tawktawk in loudspeaker thawn ausak dingin kan dil a si”, tiah a sim.

“Hihi thil pawimawh le thupi tuk a si ruangah court (thuṭhennak) lam khalah a ṭuldan ih zirin kan thlen ding a si. Hi ai ih hrilawknak (Election) Dan bahbal dang a um lo a si. Curuangah hihi fihnungza, ten-um kan ti a si.” tiah a sim bet.

Vanglaini Thuthangca vethung cun “April 11, 2019 sun ih suahmi Vanglaini Thuthangca, Cahmai hmaisabik ih MNF official symbol ARSI (Star) si loin NI (Sun) tiih nganmi kha tisual palh a si. MNF Party Symbol diktak cu ARSI (Star) a si sawn” tiah an website cahmai ah an tarlang ve.

Pu Zoramthanga in Vanglaini Thuthangca an khin ding thu a sim lai Video;