Myanmar ralkap in ramsungmi 7 an that

Karen ramkulh Kyarinn Sikgyi Anannkun khua ih ralkap pahnih in mi 7 an thahmi le hriamhma tuartu mi 1 hrangah mi pakhat ah ting 100 pe dingin rampi President hnenah an dil thu an tangmi innsang pawlih thuthangca simfiangnak ihsin theih a si. Ralkap Ih Thahmi Pawl Mi Pakhat Ting 100 Pe Ding In President Dil

April 11 ih khawpi Olympic Tower ih tuahmi thuthangca simfiangnak ah a thitu pawl thuhla ih thuthangca simfiangnak tuahtu U Than Shwe in a sim. Thah tongtu pawl hi U Than Shwe ih fapa le tu pawl an siih innsang pahnih an si thu theih a si.

“Ka fapa pawl, kan mo le pawl an thi thluh, nauhak rori khal a tel, Journal ih an ngan ahcun bike a ngah lo ruangah buainak a suak ih cutin an kap tiah an ti, a ngaingai cun cutin a si lo, annih hi inn hmai ah ra in an ra ko, an suah tikah cutin an kap cih, zianghman hua aw ih tawh-awknak khal a um lo, nauhak pakhat khal an that cih, a tangtu pawl khal an van țhat hrat ruangah a si, atu ralkap biuhahmu (ဗ်ဴဟာမႉး) ka sim, ziangtin hman ruat hlah aw, kannih cun rampi cu mi pakhat ah ting 100, mi pariat hrang kan duh tiah kan dil, a tangtu pawl hmailam nunnak hrangah kan dilmi a si, in pek khalah, pek lo khalah zianghman a poi ciamco lo” tiah U Than Shwe in simnak a nei.

Thilcang dan cu inn hmai ihsin au tahratin an ko ih inn hmai an suah lai ah mi 2 cun an kap ih nauhak khal an kap tel, meithal pakhat cu an hlon ih Anannkun khua ihsin peng 10 hlatnak ah KNU in an kaih ih ralkap hnenah an apsal thu theih a si.

“Kannih in paisa kan duh ruangah kan simmi a si lo, paisa hi ka pai’ dilmi a si, a tangtu pawl le nauhak pawl ih hmailam hrangah a si, kannih in țul khal kan țul lo, a thitu ka u le ka tu pawl ziangtin ka tuah ding ka ruat ngam lo, curuangah hitawk ah um duh nawn loin Yangon ah ka țhawn, a thitu hi mi 7 an si, pakhat cu siizung ah tuamhlawm a si, cun bike dil aw ih ngah lo ruangah thatmi an si lo, bike tawh khal an hren lo, motor khal cu thotho, atu cu annih in ka u hi an that hmaisabik, cutin midang an that bet ciamco” tiah a thitu pawlih sungkhat Ko Than Nawng in a sim. Ref : AKT