Kawl Kumthar Nikhatnak Ah Mi 3 An Thi, Mi 210 Hrawng Siizung An Thleng

Kawl kumthar titoih puai (water festival) nikhatnak April 13 ah Mandalay khawpi ahcun motor accident in mi 3 an thi ih mi 19 in hriamhma an ngah, sual-awknak ruangah mi 15 in hriamhma an ngah thu palik lam in tlangthannak an nei.

Mandalay khawpi ahcun titoih puai kilkhawi in palik pawl cu hmun 20 ah motor thawn an ding ih titoih puai nikhatnak ahhin zu le beer palang 100, nam pakhat, hmaikawr 82, funghreu (တုတ္) 7, thil hrennak (ေက်ာက္လွည့္) 64, kaihci (ကတ္ေၾကး) 8, thirfung 3 an kai ngah.

Titoih puai thawn pehparin hriamhrei thubuai 5 telin thubuai zaten 10 a um ih titoih puai thawn a pehpar lo mi, titoih puai tikcu caan ahhin mi pakhat cun thah a tong tiah palik pawlih tlangthannak ahcun an tarlang.

Tuizing April 14 zinglam suimilam 7:45 khalah Mandalay tikulh ahcun kum 40 kiangkap nunau pakhat cu tili sungah a dawp that. Suimilam 8:56 ah Mandalay senpi siizung ah a ruak fehpi a si thu Mandalay pengpi meithat zung lam ihsin theih a si.

Titoih puai ruangah hriamhma tuartu hi Mandalay senpi siizung ah mi 60 lenglo an thleng ih Yangon senpi siizung ahhin mi 150 hrawng an thleng tiah theih a si.

Yangon senpi siizung ih emergency in siizung ra thlengtu mi tam sawn cu sual aw tahratih hriamhma ngahtu an si tiah Yangon senpi siizung hotu Dr. Khin Thingki Myint in simnak a nei.

Titoih puai thokni April 13 ihsin April 14 zinglam suimilam 6:00 tiangah mi 150 hrawng cu emergency in Yangon senpi siizung an thleng ih thihnak tongtu cu an um lo na’n mi 40 cu siizung um cilh ta an țul tiah siizung hotu cun a sim.

Kum dang ahcun bike accident ruangih siizung ra thleng an tam tiah a dim bet. Ttoih puai hi Buddhist sakhua thluntu pawl cun kumthar tiah sunglawi zetin an hmang. Tuitum Buddhist sakhua thluntu pawlih kumthar titoih puai hi Myanmar ram ahcun April 13 – 16 tiang Myanmar ram hmuntinkim ah hman rero. Ref : DVB, AKT