Miphun Thleidannak Um Lo Ding In Muslim Raltlan Pawlin UN An Dil
2012 kum buainak ruangah raltlan hmunkhuarnak hmuntinkim ih um Muslim raltlan pawlin miphun thleidannak um loih bangran-awknak covo ngah dingah UNOCHA hnenah dilnak an neih thu theih a si.
Khawpi thawn a hlatnak hmun, khawte hmun dangdang ah um a siih feh sukso kham a si tikah fimthiamnak le harhdamnak lam covo hi an ngah thei lo tuk ruangah atu bangtukin dil a si thu Sittwe peng Da-paing khua Muslim raltlan hmunkhuarnak ih um Naw Saw La Nuh in simnak a nei.
“In-ei kan harsa, nauhak fimthiamnak an zir lo, minung kan harsat ruangah sii thawn tuamhlawm-awk duh khalle a ngah lo, curuangah pakhatnak ahcun hlan ih kan nun dan vekih um theisal ding kan duh, cuthlukin bangran-awknak kan duh, Rakhine, Bama, Kala ti vek hi bangranten nuntlang theinak covo kan duh” tiah a sim.
Raltlan hmunkhuarnak ahhin siibawi telin harhdamnak ih tulmi pawl famkim in a um lo. Khawpi sungah feh tahratin zalen zetih tuamhlawm-awk a ngah lo. Feh a si khalle kilhim-awknak (security) hi sumpai thawn an san tivek harsatnak phunphun an tong thu simnak an nei.
Fimthiamnak lam khalah zirhtu famkim ih an um lo hleiah phunhra on thei a si khalle phunsang tlawng kai a ngah lo ruangah ahlan bangtukin mai khua le ram ah tlung tahratih nuntu khawsak ding dilnak an nei.
May 13 sun ah UNOCHA hotu sang, UNO sungțuan bawmtu Ursula Mueller le a milai pawl cu Sittwe peng Da-paing khua Muslim raltlan hmunkhuarnak ah feh in tonkhawmnak an neih caan ih an dilmi pawl an si. Ref : Mizzima