Mual in liamsantu kan naupa James Van Cin Lian kha

Van James Cin Lian, kum 13 mi, cu tlawngkai nirukni ah a rualpi pawl thawn an vak. Minung tuah copmi tili fate Des Miones’ ih thlanglam 4200 block of Martin Luther King Jr. Parkway kiang ih ummi a si. An tili leuhnak cu tili ih a can hlan ah hmun laihnak a si.

“A rualpi pawl thawn an leh hlanah, pom khal ka pom ngah lo,” Van Lal Ven, a nu, in a sim. “Ka țang ih um lo ih in tansannak in ka thin i na ter,” tiah a sim. Lal Eng Zau, James ih pa cu Price Chopper timi dawr ah a rak um lai a nupi in James a thi tin a run call tikah, nihnih a liam hnu khalah a fapa a thi ti a ka in a simsuak thei lo.

Meredith Middle School ih tlawngta a simi James cu an tlawng ah mi ha-tah, mi zawnruat thiam le mifim tiih theihmi a si. Unau pasarih lakih a pathumnak a si ih a nu le pa mirang țong an thiam lo ruangah mail a ra thlengmi hmuahhmuah khal a lehsak theu.

James tei innsungsang cu Myanmar in U.S an thlennak kum 4 a reizo. Kawlram ih ralbuainak ruangah refugee tampi cu an tlan ih mi țhen khat cu Iowa ah an thleng. James tei innsang cu Chin mi an si. Amah James cu an innsungsang ah mirang țong thiam zet a si ih biakinn ah, asi lole thlawngah, asi lole innsang ah mi bom ding a hawl ringring.

An innsang ih rualpi, Teresa Bochung, timi cun,”Anih cu a thin a țha zet. Mi bom khal a paih zet ih mi dik khal a si. Anih cu miphun tinkim a kom- mi dum, mi rang, Asian. Mi phun dangdang a pehtlaih awter ih cun mi thlum zet ngaingai a si,” tiah a ti. James a thihnak tili cu palik pawl in a duum an ti. James le a rualpi mi 9 hrawng cu Tai Village, tili um nak hmun ah ti an leuh.

Țuanvo a latu pawl in nazi 2 sung lai tili ih a pil hnu ah an hawl cule zaanlam nazi 6 ah a ruak an la ngah. A sungkua pawl in James cu tileuh thiam tukmi a si lo ih nomnak menah a leuh a si ding tiin an sim. Kum 20 mi, Bochung, cu an fapa upabik Peter thawn an um. Kansas City church ihsin an ra tlung ciah ih James a thih thu an theih veten, zamrangten an tlung.

“An fapa Robert, kum 4 mi, cun a upa James cu a ra tlungsal ding ti a zum ziangahtile James cu siizung ah a um,”Bochung cun a sim,”A nu in an fa nautabik Asher (thla 8 luan zo) a neih tikah, siizung ah a um ii a ra tlung sal. Cuvekin, a nih khalin James cu a ra tlungsal ding ti a zum.” James, bawhlung sit le Kpop duhtu, cu tlawngkai niruk, Zion Lutheran Church timi ah a ruak vuinak neih a si ding.

Țuanvo laktu pawl in drones, tileuh thiam (diver) le lawng cu James hawlnakah an hmang. 911 an call caan le a runtu pawl in a ruak an hmuh hlan karlak ah nazi 2 tidai sungah a ruak cu a um. Tili an leuhnak cu hauhruang fate thawn a kap ah an kham.

Lal Eng Zau, James ih pa cu a fapa thihnak tili ahcun James a thih hnu ah a feh ih cule himi tili khar a si ding hmuh a duh. Cuti asilole, midang innsang in amah vek an ton lonak dingah ralrinnak signs tar dingah a beisei. Tai Village ih hotu pawl in humhimnak a silole ralrinnak thu thawn pehparaw in hmaithla ah tongawk khawmnak an nei ding.

A riahsiami a nu cu a fanu le a rualpi pawl a fapa thu a rel tikah hnemnak an nei. An rualpi le an mitheih pawlin an innah tohpinak an nei. James ih zuk le a ca nganni pawl cu phar ah Jesuh Khrih ih zuk kiangah an tar. A ca nganmi lakih pakhat a simi ah an innsungsang biaknak lamih an pumpeknak a tarlang.

“Van timi ih sullam cu ‘sky’ (mirang in a ngan) a si ziangahtile kan Pathian cu vanram, van kan hmuhtheimi tlunah a um,” tiah James in an tlawng assignment ah a rak ngan,”Ka nu le ka pa in vanram kai ding in duhsak ruangah a si ding ka hmin cutin in sak.” tiah a ngan.

A nu,Van Lal Ven, in a fapa pom ngah nawn lo hmansehla, a fapa ca nganmi pawl a zoh thei ringring, cumi in an innsang cu James ih a thlennak ding ruahsannak a pe. A nu cun,” Kan fapa cu mi duhdawt thiam zet asi; a nu le a pa lunghmui ding a duh ringring. Amah na zoh tikah, mi hlawh tlingsi a duhzia le kanmah, a nu le pa, in kilkhawi zia na hmu thei.” “Amah cu ka hero a si.” tiah a ti.