Burma Campaign ah UK cun Ralkap pawl Facebook Page Phitsak Dingin a Dil

Myanmar Tatmadaw / Ralkap pawl neihmi simaw, an uk mi simaw hmangih Facebook parih ca nganmi 25 leng lo cu hlonhlohsak thluh dingin Burma Campaign UK (Kawlram hrangih nasa zetih cangvaitu) pawlin Facebook company hnenah June 5 khan an dil.

Hlon dingih an duhmi page pawl lakah hin Ralkap (lei ralkap, ti le tlun lam ralkap hmuah hmuah) pawl tuahmi Facebook page pawl, Ralkap magazine pawl, Mytel, Ministry of Information Committee member pawl, Economic corparation, Myawadi news le TV, Myawadi Bank, Mandalay Bear, Bandhula Parami Transport, Shwe-gandamar Trade, Kan-thar-yar Hospital le Shwe-phi-Oo lakphak tivek pawlih Facebook page pawl an tel tiah RFA in a sim.

Ralkap le an ai-awh pawlih Facebook page pawl hin followers ting 3 tlun an nei ih. Mi huatnak lungput karhzaiter nakah simaw, tlang par mi mal sawn (တုိင္းရင္းသား လူနည္းစု) le biaknak lamih si zoh khalih mi mal sawn (ဘာသာေရးအရ လူနည္းစု) pawl donak hrangah simaw, awlsam tein hmanruaah an hmang thei a si, tiah Burma Campaign UK in an thusuahah cun an ngan.

Hiti Burma Campaign UK lamin an timi thu thawi’ peh-paraw in Ralkap hotu lam ihsi thu sim theitu Gen. Zaw Min Tun cun, Myanma Economic Corporation le Mytel page pawlah hin sipuazi lamih thu thanh duhmi te te lawng an cawngia ih, phun le hnam thlei dang thei ding thil zianghman an ret dah lo tiin, le huatnak thuhla lam kha zianghman an ngan dah lo tiah, Iarrody news lamah a sim. Hi thu thawn pehpar-aw in Facebook company lam ihsi thusuah cu tutiang zianghman kan thei hrih lo.