Benjamin Sum Sunglawi zetih hmuah an Tum
Mipi thinlung luah khat biktu le mipi thinlung ih nehnak cotu Benjamin Sum cu a ra lai dingmi January 5 (Zarhpi ni) Sunhnu nazi 2 ah suahsemnak lam pan in a hung tlung thlang ding tiah theih a si.
A suahsemnak, Lairawn, Kalay/Tahan ah Sunglawi zetih hmuah an tum ti thu kan thei. Chin Pawlpi ih hohanak in hmuah a si dingih himi Benjamin Sum hmuaknak hrangih cemliam mi hmuahhmuah hi Benjamin Sum ih tlawng a rak kainak GCEC Sayakyi Mang Lian Tlung le YCW Sayakyi James Thang in an tum ding tiah theih a si.
Benjamin Sum hi suahsemnak Lairawn ih a hung tlun veten, Mipi thawi tawnawknak tawlrel sak a si cih dingih, khuitawk ah neih ding timi cu a fiang lo nan amai’ suahsemnak khua Hmunlai bualrawn hi si thei dingin Hmunlai mino Pawl Cun an beisei ih stage le thil dang ṭul hmuahhmuah khal an tuahthluh ding thu theih a si.
Hmuahnak Alante (flag) hi 1000 tuah zo a si ih biangben ding phunphun khal timtuah a si. Benjamin Sum cu Myanmar Idol ih Grand Final zuamawknak an neih hlante ah suahsemnak khua ih tlung dingin Myanmar Idol ṭuanvo neitu lamin, colh an pe nan, remcanlonak ruangah le harhdamnak lam ruangah tlunglo in an ṭhulh sal.
Zuamawknak an ṭheh fel hnu, “January 5 (Zarhpi ni) Sunhnu nazi 2 ah a hung tlung thlang ding’. Air ticket khal lei fel a si zo. Sunlawih ih hmuak theitu dingin Kalay Airport ah Nazi 1.30 PM ah thleng thei tum cio sehla. GCEC le Tlawngta dangdang khal rak pawk cio dingin kan lo sawm.” Tiah GCEC sayagyi Mang Lian Tlung cun a Facebook cahmai ah a tar.
Cun Benjamin Sum hi Lairawn ih Pyinkhonegyi khua khalah sunlawihnak neih a si ding. Benjamin Sum hi WINNER a si ah maw, asilo ah maw, Vok ka thah ding a si tiah, Phyinkhonegyi khaw mi Salai Maung Maung cun tuihlan ah a rak sim ih, a sim vekin Vok a thah taktak ding thu khal theih a si.
Video zoh duh hrang;
Chin mi pumhuap asimi Chin Pawlpi ih hohanak thawn hmuak ding asi vekin, mipi thinlung ih WINNER a ngahtu Lairawn suak, Chin Tlangval, Benjamin Sum hi Lairawn ih a ummi kan Chin mipi a tam theibikin le a sunglawi thei bikin kan hmuak cio pei uh.