Lairam mawinak le mankhunnak pholang ṭhehtu Salai Tawna ih hla, My Birth-Place, မွေးရပ်ဌာနေ: Video

Kan Chinmi in Awnmawi khawvel (music world) ih micungcuang kan neihmi pawl lakah kan “Pa” bik a si mi Dr. Salai Tawna ih “My Birth-Place, မွေးရပ်ဌာနေ” timi hla cu a mawi in, kan Lairam mawinak le mankhunnak pawl a pholang ṭheh rori cu si. A hla thu a ṭha, a thluk a mawi fawn, music a mawi fawn, a saktu pawl an thiam fawn, ngai a hahdam in lung a leng ruahro rori si.

Hivek hla ṭha le mawi, kan Lairam mankhun zia pholang ṭhehtu hla in phuahsak hi ava sunglawi lawmam ve. Salai Tawna hi tuihlan ihsin kan Lairam mawinak le mankhunnak pawl Hla in rak pholang rero zotu a si. Chin Miphun Ni (Chin National Day) a rung thlen tinten kan hlapi a si mi le mipi thinlung ih rung lang bikmi “ချင်းတောင်တန်းမှ ကြိုဆိုလျက်”, “ချင်တို့ဌါနေ” tipawl khal amai ir-awm suak an rak si.

“My Birth-Place, မွေးရပ်ဌာနေ” timi hla mawi tak hi, kan Laimi lak ihsin rampi huap ih hlasak thiam hminthang, Sung Tin Par, Fred, David Lai le Jenevy Sui pawlin mawi takih an sakmi a si.

Dr. Salai Tawna hi Falam peng Saṭawm khua ih suak a si ih, a hmin ngai hi Za Tawn Eng ti a si. Awnmawi (Music) hi kum 5 a rak ti hrawngin a rak uar thawk. Cutin Yangon University ihsin B.A a ṭheh hnu ah, South Korea ah B.A (Music) le America ah B.A (Music) a ṭheh suak. Cuhnu ah England ram ah M.A (Music) a ṭhehsuak lala ih cutin 2018 October thla ah Switzerland ram ih University of Bern ihsin Ph.D (Music) a ṭhehsuak a si.

My Birth-Place, မွေးရပ်ဌာနေ; Video