Canadian Vuanzi Chuk ih Nupi Coronavirus a kai

Canadian Vuanzi Chuk (Prime Minister), Justin Trudeau ih nupi Sophie cu ruahbanlo zetin Coronavirus a kai thu Canadian cozah cun mitute ah khan mipi theih ah a phuang lang a si. Canadian PM ih nupi hi besia le damlo luarkai zet cu a si lo tiah an sim cih. Amah, Prime Minister Justin Trudeau khal a damcak zet thu theih a si.

Tufang ah nat-kaitu Canadian MP ih nupi Sopie Gregoire Trudeau hi hmun fianhrial ah a hranten ret ṭhat hrih a si. Tu hrih ah cun a damcak zet lai, alang dan (symptoms) mal takte lawng a lang hrih, tiah official cun an sim.

Himi hi thuthar hlam bik theih netmi a si ih, kan run lo upload vivo ding a si, tiah Fox News, Thuthang cun a tarlang a si.

Leitlun hmunkip ah Coronavirus hi a darh cak nasa ih a hmaisabik a ra suahnak hmun, China riangri hi a dam khawsuak an tam vivo thu theih a si. US khalah Laimi tampi umnak Indianapolis ih Tlawng hrekkhat tla cu April 5 tiang lai khar an si ding thu le, Biakinn ih khawmnak khalah minung 250 hnakih tam pungkhawmawk sian a si nawnlo thu, US ramsung State dangdang khalah Tlawng an khar thu theih a si.

Mizan lam ah Kawlram khalah nat-kaitu mi pakhat um vekin an sim ih, thuhla fiang theih bet ding tutiang ah cun Official in tarlang a um hrih lo. Laimi tamtak umnak Malaysia khalah nat-kaitu a ni ni in an pung vivo. Mah le umnak ciar ah thei tawkin ralring cio in thlacamnak thawn Pathian hnen ah thlen cio uh si.