Chin Ramkulh Biakinnpawl COVID-19 Natnak Lakih Kilhim Awknak Sii an Kap Ding

Coronavirus nathrik a karhzai lonak dingah tiin Chin ramkulh mipi pawl cun kan tawnkhawmawknak bik Biakinn pawl cu nathrik thahnak sii (ပိုးသတ်ဆေး) kap dingin dilnak a um ih cui’ dilnak cu ramkulh acozah bawmnak thawn alak in biakinnpawl ah ပိုးသတ်ဆေး kap a si ding tiah ṭuanvo neitu upa lam cun an sim.

Chin ramkulh sipin vuanzi U Soe Htet cun “Biakinnpawl tla nathrik thahnak si (ပိုးသတ်ဆေး) kap thluh an si ding. A thupimi cu khaw nu/pa pawl le ṭuanvo neitupawl an si ko. Cun kawhhran lam in tla an dilmi parah kap sak dingin, ramkulh acozah in cemliam mi hmuah cu azaten a liam thluh ding. Cupawl tuah dingin azaten sim ṭheh a si zo, kawhhran tin ih biakinn ah kap dingih a diltu an um asi ahcun kap sak vivo ding a si” tiah a sim.

Chin ramkulh Coronavirus nathrik khamnak hrangah Tedim, Tonzang, Falam, Hakha le a dang khawpi pawl khal mipi punkhawmnak bik asi vekin kap vivo ding a si tiah a sim bet.

Ramkulh acozah lam ihsi cun mipi punkhawm awknak hmunpawl cu ပိုးသတ်ဆေး kap a si rero. Kap peh vivo ding a um lai. Pengṭhen acozah ṭuanvo neitupawl in hma an run la vivo ding, cupawl hrangih a ṭulmi ca thupi pawl khal ka hnen ah a um ṭheh tiah U Soe Htet cun a sim.

Tufang Coronavirus thawn pehpar in Myanmar ram dinhmun cu natnak neitu mipum 14 an si zo ih, an zaten Yangon ihsi nat ngah an si. Tuihlan ihsin hi natnak hi rak ngah cia zo mipakhat cu a thi zo. Salai C. Lian, Chin World