Ka Pa le ka rualpi thabik an ngaizawng aw, ka Pa in fa a raih…
Cakkhai za thuanthu a si. Maria thawn kan rualpi awknak hi a rei zet thlang, High School kan kai lai ihsin a si. Ka unau vek rori ih ka ruahmi a si. Kan harsat can ah le kan riahsiat can khalah kan bawmaw ringring ṭheu.
Hmanseh Maria hin a inn lam ah thubuai a nei. A kum 18 birthday ah, a nulepa thawn an to aw ih an inn ihsin an dawisuak. Curuangah Maria cun ka inn ih ni reilote sung um dingin I dil.
Anih cu ka rualpi ṭhabik a si, si e, a si rori. Zarh kar reilote sung cu ka pa in ka rualnu ih ei-in pawl le thil ṭul ṭukṭak pawl a pek sak thluh.
Na hmu maw, ka nulepa hi, ka pa cu a hnaṭuannak company in a sinak an khaisang ihsi kum siar reilote hnu ah an ṭhenaw. Hmakhatte ah, tuihlan ih a hlawh zat hnakih let thum tam paisa a ngah ih cumi cun a ti danglam. Mawṭaw tharte tla a lei ih, ruahbanlopin fala mawite tla a hi mitmei bet.
Ka pai fala thar ka Nu in a hmuh le phei cun ka Nu in ka pa a ṭhen cih rori si ko. Tuisun tiang ah, ka pa in ka nui parih a thilti dan ruangah, ka ngaidam thei riai lo a si, ni khat hnu ni khat a ciangkuang lo, a ler deuhdeuh.
Ni khat cu kan lehnak ding thu ruangah hmun hla ih khualtlawn a ṭul ta riai. Zarh khat lenglo khual ka tlawn hnu ah ka ra tlung ih, inn ka thleng cu ka rualpi ṭhabik Maria cun mithmai pan siamsi ten I rak zoh ih, thu lo ruah lohli ding ka nei hokhaw tiah I rak sim.
Mizan I thilcangmi cu amak tuk zum hman na zum lo ding, tiah I ti. Na pa thawn movie kan zoh tlang ih wine tla mal lai kan in tlang, kan thuhla thuk sin in kan thei aw vivo, cucu si ko thilcang mi cu.
Ziang tikah, ziang thil cangmi cu, tiah ka sut.
Maria cun “a ṭha e, tawkfang kan umtlang hnu ah, kan naihniam aw vivo si ko, a sinan a dang cu cipciar in ka lo sim duh lo mei ke, na pa si em mei, tiah I ti.
E he, hi hi cu thil tenau men a si lo, ṭihnung thil a si. Ziangah tile Maria hin kan dung lai ah a tlangval hlun pawl par ih a thiltimi in a langter. Ni khat cu a Ha thlawngnak hrangah paisa a neih lo ruangah a tlangval pawl hnen ah dollar 1,000 cawi a dil.
Mifarahte a tlangval pakhat cun $500 te lawng a rak nei kherkher, a computer neihsunte zuar in angahmi paisa $1000 cu Maria a pe. Sinan Maria cu a Ha khal a thlawng lo, a hmaizarh ah a tlangval cu a paisa cawimi khal rulsal nawn loin a ṭhen daih. Cun a tlangval pawl a bummi thuhla pawl khal tampi ka thei lai.
Curuangah ka Pa thawn ngaizawng aw ding cun ka duh hrimhrim lo. Ahleice in ka Pa in paisa tampi a nei timi a thei betbet fawn. Ka ti duhsan cu, Maria hi mifim hrawkhrawl paisa mit nei a si. A nulepa in an dawisuak hnu le phei cun sumpai lawnglawng mitmei ih khawsa a si. Ka pa hi a hmuibat mi a si bik ding.
Hui ha, a hmaizarh ahcun an ngaizawn awk thu langhngan zetin in sim ngaingai thlang. An ngaizawn awknak an lawm kual vel, ka Pai’ mawṭaw ṭha sport car hmang ta hrat in Los Angeles ihsin Las Vegas lam ah cawlh-um an va hmang tlang.
An ra tlung cu, Maria cun ka Pa thawi an thuhla pawl le an can hman dan pawl I ruah thluh. Casino game leknak ah $20,000 an hman thu, an hotel riahnak tla zan khat ah $250 a si thu pawl.
Na pa hi a va lian lawmam ve, kha zatzat paisa a rak nei, tiphah in a ṭawng cu a cawl.
Aih, dawh ceu nu, paisa lawng duh, mi hlothlau tuk a si hi. Ka pai’ hnen ah ka feh vurvo ih, Maria hin na paisa lawng hokhaw a duh, nangmah taktak a lo duh lo, tiin ka va sim. Ka Pa cun “ka duat, na thinhar awhlah, ka thei thluk ko hokhaw, tiin I sawn.
Awle, si tuk e….Immm. Maria hi ka lakah a rinum lo a si tin ka ruat thlang. Umnak neilo ih vakvai a si ruangah kan inn ih reilote ka rak umtermi asi nan, tu ah cun ka Pai hnen ihsin amiat hmuah hmuah a ngah thluh tum. Cubet bet ah, an pahnih lungkim thlap ih duh aw an si vekin kei hnakih thu neisawn vekin a cangvai sapbai. Keimah hman ih ka mawn dahlo mi ka Pai sport car mawṭaw mawi tak cu shopping fehnak men ah a hmang zekzo bet.
Asinan vun dawisuahnak ding ah le tu cu a tlai tuk zo fawn. Ka pa khalin a duh lo ding ti ka thei. Asinan ruahsannak cu ka nei hrih lai. Ziangahtile ka Pa hi Maria vek thotho in miler deuh a si, ka Pa in Maria a kawk ding lawng ka hngak si hrih phawt ko.
Zarh tawkfang a liam hnu khalah an ngaizawn awknak cu a fehtluang vivo lai, Maria khal milian dinhmun ih a um cu nuam a ti aw zet. Ni khat cu ka hnen ah phur le thatho zetin a ra ih, “Ziang na zum, Ziang na zum? Na pa cu a hnaṭuannak ah a sinak khaisan sal a si ih tu cu financial hotu a si thlang, cui’ umzia cu a thlahlawh cu tu hngakih let in a tam ding” tiah I ra sim.
Aw lalpa leh…ziangtin saw ka pa in hivek fala a duh thei? Hi nu cu ei-dawk tu men a si, paisa lawng sisi a duh. Tawkfang zarh hnih hnu ahcun zumcia vekin Maria cun nau a run pai ngaingai.
Ka Pa cu um ngaihnak khal theilo in a hrum durdo, A si lo, a si lo, a si thei lo, thil cangthei a si lo. Thin hngirṭeu vansang in a um thlang, cui naute cu kum 18 a hung ti tiang a enkawl ih support a ṭul ti a hun theisuak.
Ka thinlung te cun, ka Pa cun a ci tuh rah a seng si ko, ka ti men. Asinan Maria cun mithnawm tiat hman hi dinhmun hi a phu lo. Kei cu amah zangfah in ka rak bawm, asinan anih cun kan sungkua in siatsuah tlun ah kan paisa in eidawk.
Maria nau a pai hnu cun, kum 51 ih upa ka Pa cu a ra tawngin a ra hmu paih nawn riai lo. Ka Pa cu a ni hrangah a rak upa tuk ngai. Curuangah a nulepai hnen ah kirsal in an hnen ah a va um. Naute a vun neih hnu cun ka Pa thawn naute hrangah ziangzat pekawk ding ti an relcat.
Thinhar zetin ka Pa cu ziangti thu saw hitizawng ih nan lungkim tlang, tiih ka sutnak khal zianghman I let lo. Curuangah ka rualnu Maria cu cakuat in ka sut.
Anih cun thla khat ah $14,000 pe aw dingin kan relcat, tiah I rak reply cih.
Aw lalpa leh… US ram ih hnaṭuan pangai pawlih hlawh hnakih lethnih in a tam sawn ual. Anih cu naute enkawl men lawng asi ual. A parah ka lungawi lo nasa. A ni ni in ka huatnak a luar sinsin.
Tawkfang ah Maria cu ka Pa ih paisa thlatin $14,000 a pekmi cu a duhtawk hrih cuang lo. Ka pa cu rak bumkual vel a tum, thla tin $25,000 I pek lo asile, naute hi ka hlawnhlo ding a rak ti. Hi ṭum ahcun ka Pa in Maria cu pindan sungah ko in cu zatzat ngen awlo dingin fimkhur le ralring zetin a dil.
Asinan Maria cun paisa ka lo dil zat I pe ding maw, asilole naute in a tuar ding, tiin a sawn. Ka Pa cun a thupte in an biakawkmi pawl Camera in a rak record thup ih Maria in thil diklo a timi pawl awlten tazacuai theih a si thlang. Thla khat sung thawng a tlak men lawng si loin a fa khal a kutsung ihsin lawn a si vethung. Cucun ka Pa cun thla tin paisa a pek ringring a ṭul nawn lo.
Cuhnakin keimah in ka enkawl sak man ah ka Pa cun thla tin $10,000 I pe riangri sawn, anih cu a hnaṭuan ah a buai tuk fawn si. Kei le College kai lai ka si fawn, ka buai ve tuk ruangah nau ka kil man loih kan naute in kilsak dingin hnen-um ka la ih anih cu thla khat $3,000 ka pe. Cutin college khal tluangten ka kai thei ih, zanlam ah naute ka enkawl ve.
Ka naunu duhnung zet cu a Nulepa mihlothlau an si ko nan ka duhdawt thei nasa.
Video thawn rak zoh ve aw;
Hminsin: Hithu hi Audio in tuah siseh, website dangih post sawng kan sianglo.