Breaking News: Myo Gyi in Covid-19 Natnak A Ngah; Video
Tulai fang Myanmar ram pumhuap deuh thaw ih a buaipi zetmi, rampum huap hlasak thiam Myo Gyi ih Coronavirus thuhla cu a tawp ahcun thudik a rung suak taktak thlang. Tuihlan ah thu diklo le zumhmang tarlang celcel a si ih, tu ah cun ramsung thuthang langsar 7Day TV, The Voice le Website dang pawl khalin official in an tarlang thlang.
Myo Gyi hi COVID-19 natnak a nei ih an rinhlel deuh ruangah fianhrial (Quarantine) in an nupa ten an ret hnu, April 13, 2020 zan ih an result suakmi ah minung 12 pawl hnen ah COVID-19 natnak an hmu thar ih cumi mipum 12 lakah Myo Gyi khal a tel a si tiah rampi palai U Htun Myint in a phuang lang a si.
April 13 zan ih COVID-19 natnak ngah thartu mipum 12 pawl lakah Myo Gyi hi number paziat nak ciah a si ti cu theihfiang a si hrih lo. Hlasak thiam Myo Gyi hi Biakinn ih khawmpi pakhat ah hlasak ih feh vetu a si. An khawmnak ah COVID-19 natnak neitu an rak tel ruangah, Quarantine in ret a si. Nat an check hnu ah April 13 zan ah an result a suak ih cutin Covid-19 confirmed case a si.
Ministry of Health and Sports, Myanmar in a tarlang dan vek asile, COVID-19 natnak ngahtu number, 24, 34, 35, 36, 37, le 41 pawl hi Biakinn ih an khawmnak hmun ihsi ngahtu an si tiah an tarlang. Cui’tlun ah mina number 34, 35, 36, 37 pawl an khawmnak ah hin ramdang mi khal an telve tiah an sim.
Natnak ngahtu pawl ih number an tarlangmi lak ihsin number 37nak khi Myo Gyi a si tiah mi ṭhenkhat cun an sim tiah 7Day TV cun a tarlang. Myo Gyi ih nupi cun tui’ hnu lam cun rampi acozah ih thusuahmi cu zawnlung zetin kan thlun thlang ding a si tiah amai’ facebook cahmai ah a tarlang.
April 13 zan ah hin result 186 a suakih cumi pawl sung ihsin mipum 12 cu COVID-19 nathrik kaitu an si. Cui’ mipum 12 lakah hlasak thiam Myo Gyi hi a telmi a si. Thuthang dang hrekkhat ah himi an khawmnak hmun ih an pastor asimi David Lah le an music Drum tumtu khal COVID-19 nathrik an ngah tiah thulengvak a um nan, thuhla fiang ngaingai official in than a si hrih lo hmang.
Video ah rak zoh ve aw;
Thulaknak: 7Day TV, The Voice