Malaysia ah Movement Control Order (MCO) A Cem June 9, 2020

Zozo khal in kan nin zetmi le cem zangzang seh tiah saduh kan that rero mi Malaysia ram ih, Movement Control Order (MCO) asilole Lockdawn cu June 9 ni ah cemter ding a si thu Malaysia Prime Minister Muhyiddin Yassin cun June 7 zanlam nazi 3 ah thuthannak a rak nei.

Leitlun huap pulhnat covid-19 ruangah Malaysia ram ah 18 Mar 2020 ihsi thokin ni 84 sung kharhkhumawknak in caan hman a si hnu ah June 10 ihsin caan thar hman a si leh thlang ding. June 15 ihsin thok zing le zaan bazar khal a kel tein on thluhsal asi thlang ding. Amah lawngte Biakkhawmnak le mipi umkhawm ih caan hmannak tivek pawl cu sian a si hrih lo ding.

Tuah thei dingih an retmi pawl tla cu
1. Malaysia ram sungah ah khualtlawn sian a si. State dang in a dang state ah khual tlawn khal sian a si thlang.
2. Sumdawng dawr tuah pawl hrang a hlan vek in a kel tein dawr on sian a si.
3. Sammet dawr, hmai timawiternak dawr, kuttin remnak dawr pawl on sian a si.
4. Museum(hlan thil hmuhnak) pawl on a si thlang ding.
5. Ngasio, hram lak vak tivek pawl khal sian a si zo.
6. Meeting, thurelkhawmnak, thuzir khawmnak (mi tampi um khawm lo) in a ngah zo.
7. Zinglam bazar le zaan bazar khal June 15 ihsin a kel tein zuar/on a si leh thlang ding.
8. Leknak lam ah arhmul thawi, Pingpong lek, Tennis thawi, Cyling (bicycle to) taksa pum dai awk tul lo pawl lek sian a si thlang.

Sian hrih lomi pawl
1. Bar, Pup, Night Club ( Nomawknak dawr), Karaoke, Mi bur rawl ei khawmnak, Theme Park, Tileuhnak hmun pawl on a si hrih lo ding.
2. Taksa hmehnak dawr le thil dangdang nomawknak dawr tivek pawl on a si hrih lo ding.
3. Bawhlung sit, Basketball, Rugby tivek pawl lek sian a si hrih lo.
4. Biakkhawmnak le thlacam khawmnak mi tampi um khawm tivek sian a si hrih lo.

Malaysia acozah in thlun ding daan SOP an tiih (Standard Operating Procedure) an tuah mi a um ih cupawl cu
1. Minung khat le khat naih aw tuk ih um lo ding, a naibik ah metre khat ( pi 3 le khuai tal ih hlat in um ding.
2. Leng suak tikah hmai khuh hman ringring hrih ding
3. Kut fai tein kholh ding.
4. A tul tuk lo ah vak sukso tam lo ding

Kan zaten kan him theinak dingah Daan thlun thei zuam cio uh si.

Duhsaknak thawn

FPM-FRO