AA Thuhla Ruangah Thuthanglatu Mi 4 Cu Council Zung Ah An Zuar

Acozah in tapung tiih a tlangthanmi Arakan Army (AA) thuhla nganmi hrekkhat thawn pehpar aw-in Media daan an pahbal tiah thuthanglatu minung 4 cu Myanmar Press Council (MPC) ah palik pawlin an zuar thu theih a si.

MPC ih zuar tongmi thuthanglatu minung 4 cu Mandalay hrambun Voice of Myanmar ih Chief Editor Ko Nay Myo Lyn, Yangon hrambun Khit Thit Media ih Chief Editor Ko Thar Lun Zawng Htet, Rakhine ramkulh hrambun Narinjara ih Chief Editor Ko Khaing Myat Kyaw le American hrambun RFA ih Myanmar ram Yangon office hotusang Ko Moe Myint pawl an si.

Hi thuhla thawn pehparin MPC cun thuthanglatu minung 4 cu thurelpi a duh ruangah June 25 ah Yangon ih Council office ra dingin theihternak a tuah zo. Thuthanglatu minung 4 zuartu cu CID ihsin police major le police captain pawl an si tiah theih a si.

Arakan Army (AA) cu ralhrang tapung an si tiah acozah in 2020 March 23 ah thuthannak a rak nei. AA thawn pehparin thuthanglatu minung 4 nganmi cu Media law article 9(h) ih tarlangmi “suahnak, biaknak, miphun pakhat sirhsan in buainak a suak theimi ca ngannak hrial ding” timi an pahbal ruangah Council in an thuhla relsak dingin zuar an si thu theih a si.

Zuarnak ca ih tarlangmi ahcun RFA in AA hotu Htun Myat Naing thawn thuhla suh-awkmi “Rakhine ramkulh a hranten ding dingih fehpitu AA (verse – 1), AA thusimtu Khaing Thu Kha le Voice of Myanmar thusuh-awkmi cu Khit Thit Media ah “kannih cu ralhrang pawlkom, theihpinak a um lo tiih an tlangthanmi pawl hi khatlam ahcun remdaihnak hnatuan thiatbaltu an si” timi title an tarlang sal thu council office ih zuarnak ca bangtukin theih a si.

AA thusintu Khaing Thu Kha thusuhmi cu March 27 ah Voice of Myanmar in a tarlang hnu Chief Editor Ko Nay Myo Lyn cu ralhrang dokalhnak lam daan pukmah 50(a)/ 52(a) thawn March 30 ah Mandalay palik in an rak kaih. Cuihnuah ralhrang dokalhnak lam daan thawn a thuhla a kalh aw tiin April 9 ah an rak thlahsal hnu Council thawn thurel dingah CID in Council zung ah an zuarsal.

Rakhine ramkulh hrambun Narinjara Chief Editor Ko Khaing Myat Kyaw khal March 26 ih tarlangmi AA thuhla pakhat thawn pehparin simfiangnak tuah dingah Council zung ah an rak ko. Narinjara thuthanglatu minung 3 cu palik in March 31 zaanlam suimilam 6:00 hrawngah an rak kai ih, Chief Editor Ko Khaing Myat Kyaw thuhla le thuthang suah dan pawl an suh hnuah an thlahsal.

Myanmar Press Council (MPC) Asst. Secretary U Myint Kyaw in “hi news department ih minung 4 hnenah thuhla theihternak kan tuah zo, palik ih zuarnak pukmah thawn pehparin a zuartu pawl hmuhsaknak men a si” tiah a sim.

“Hihi cu a zuartu pawl hmuhsaknak men a si, council cun an simmi bangtukin kan tuah lo nasa ding” tiah U Myint Kyaw in simnak a nei. Cuihleiah thuthang minung ih thuthang nganmi thawn pehparin thubuai tuah ciamco loin council ah sim hmaisa dingin ramsung tlangbawi zung telin acozah department zaten tuletu forhfialnak tuah a si ruangah atu bangtukih council lam ah an zuarnak a si lo ko ding tiah U Myint Kyaw cun a ruah dan a sim.