Ralhrang Tapung Pawl Ih Phen Ah Thazang A Cak Zetmi Ram Pawl An Um : Min Aung Hlaing

Ralhrang tapung pawl cu ralkap in dai ko in do ding a zuam tuk ko na’n an phen ih dinpitu thazang a cak zetmi ram tumpi an um ruangah ramkhat men ih tuah daih thei ding a si lo thu Senior General Min Aung Hlaing in Russia ram ih tuahmi Victory Day of Great Patriotic War kum 75 kim program a fehnak ah Russia thuthangca ZVEZDA hnenah simnak a nei.

“Ralhrang tapung pawl do tikah tuanvo neitu ram cun do theinak a nei ko na’n, hi ralhrang tapung pawl phen ih dinpitu ram tumpi ruangah ramkhat lawngih tuah a theih lomi khal a um” tiah Senior General Min Aung Hlaing in a sim.

Curuangah ralhrang tapung a duh lotu ram pawl kom aw-in hnațuan a tul thu, komkhawm hnațuan a cang theilo a si ahcun ralhrang tapung pawl do dingah harsatnak a um ding thu Senior General Min Aung Hlaing cun a sim bet.

Senior General Min Aung Hlaing ih sim duh sanmi ralhrang tapung timi tongkam sullam cu Arakan Army (AA) le ARSA a ti duh san thu ralkap thusimtu Major General Zaw Min Htun in a sim.

Senior General Min Aung Hlaing in “annih ralhrang tapung thazang a nungmi cu kan thah cimit sak dingmi a si, minung a si ahcun minung thazang in kan tuah ding, hriamhrei a si ahcun hriamhrei ngah lo dingin kan tuah ding, cerek le zian a si ahcun cerek le zian nggah lo dingin kan tuah ding, tangka ngah lo dingin kan tuah ding” tiah simnak a nei.

Ralbawi pension ramkhel research tuahtu Dr. Aung Myo in “kan sim asile anih (Min Aung Hlaing) ruangah a silo, atui dinglai acozah khalah Rakhine thawn pehparmi, Rakhine mipi thawn pehparmi ramkhel duhnak a um si ko, Dr. Aye Maung thawng an thlak sakmi ah thukhat, cun khursung suak thilri zem-awknak ah Rakhine mipi pawl an lungkim lo tukmi ah thukhat, himi pawl ruangah Arakan Army (AA) tapung cu Rakhine mipi ih thazang peknak tiang a suahpi phah” tiah a sim.

“A ngaingai cun AA thawn pehparmi sungah Tuluk, Thailand, India, Bangladesh an tel thluh, a tellomi ram an um lo ti ding khop a si, Tuluk ramri khal a pehpar, Thailand khal meithal le cerek a phurh rero kha, AA tankhuarnak khal Bangladesh le India ramri a si, hi ram pawl hi pehtlaihnak tha dingin kan tuah thei pei maw timi ah a thawm aw” tiah Rakhine thuhla research tuahtu U Maung Maung Soe in a sim.

Arakan Army (AA) tapung hotu Htun Myat Naing cun “tangka le hriamhrei a that lo ahcun revolution hnațuannak a ding suak thei lo ding, cun khuitawk ih ngahmi timi a hrampi cu tui caan ah kan thup hrih ding, midang in an hawl hmuh asile an phuang si pei cu, kannih cun kan thup ding, himi cu thihnak le nunnak thuhla khal a si, atu hrih ahcun kan sim thei lo, revolution kan hlawhtling tikah kan phuang leh ding, cumi cu thuanthu ah kan ngan ding” tiah 2019 January thla ah a rak sim dah zo. Ref: Irrawaddy