Arakan National Party: Rakhine Ramkulh Ahcun Rakhine Party In Nehnak Kan Co Ding
Arakan National Party (ANP) cun Rakhine miphun sinak a derthawm hlan lo hrilawknak ah nehnak co ding an ruahsan ih NLD cu a hleice ih an zuam ding thu ANP thusimtu in simnak a nei.
“2020 hrilawknak tuah a si ahcun Rakhine miphun pawl ih miphun thinlung a hloh lo sung cu Rakhine ramkulh sungah Rakhine party in nehnak co ding ruahsan a si thu” ANP thusimtu Daw Aye Nuh Sein in a sim.
2015 hrilawknak ah ANP cun ramkulh palai hmunram 35 ah hmun 22, miphun palai hmun 10, senpi palai hmun 12, Rakhine Affairs Minister (RAM) hmun 1, a zaten hmun 45 ah nehnak a rak co.
ANP cun Rakhine ramkulh hleiah Yangon, Irrawaddy, Chin ramkulh thlanglam Paletwa peng pawl ah zuamnak nei a si dingih, a hleice ih zuam dingmi cu NLD le AFP an si tiah Daw Aye Nuh Sein in a sim.
“NLD cu rampi huap in an zuam ding sisi, atu acozah dintu party khal an si, Rakhine ramkulh khalah a zaten an zuam ding sisi, curuangah hi party cu kan zuam dingmi a si tiih kan sim lo cun ziang party saw kan zuam dingmi tiih kan va sim nawn ding” tiah ANP thusimtu Daw Aye Nuh Sein in a sim bet.
Rakhine ramkulh sungah ANP, ALD, AFP tiin ramkhel party 3 a um ih, ALD le AFP cu ANP ihsin suaktu le hnawh tongtu pawl ih dinmi party a si. 1990 hrilawknak ih nehnak cotu Rakhine National Democracy Party (RNDP) le Rakhine National Development Party (RNDP) cu 2015 hrilawknak tuah hlan deuhte ah Arakan National Party (ANP) tiin an rak kom aw.
Hrilawknak theh hnuah party sung hmuh thiam-awk lonak a suak ih ALD le AFP tin party thar an din. ANP chairman hlun Dr. Aye Maung cu ANP ihsin a suak ih AFP a din. 2018 lailak hrilawknak ah Yatitawng peng sung ihsin ANP a neh.
AFP dinhmun in hrilawknak hrang timtuahnak zianghman an nei loih Insein thawnginn ih thawng an thlakmi party chairman Dr. Aye Maung thuron dingah an tawlrel thu central committee sungtel U Kyaw Lwin in simnak a nei.
Ralkap le AA karlak buainak hleiah Covid – 19 ruangih rikhiahmi a um hnuaihni ruangah campaign tuahnak lam harsatnak a um thei thu khal Rakhine party pawl cu an thla a phang zet.