Tualsung thutawi
Tualsung thuthang. Tualsung khalin thuthang duhum zetzet phuansuah ding a um thei hrih lo. Kan duh lo zet theumi kan ral pawlin an khat. Cumilak ah ralkap uknak duh lo ruangha nitin ten mipi in an do zawk rero mithi an pung rero, mi harsa le raltlan an tam vivo. Cu rualrual in natnak siava Covid ruangah Chinram Kalay kabaw sehvel telin Chinmi pawl raltlannak le ralkennak hmun Mizoram tiangin a vawihniknak natsia thlisuarpi a hrang sal.
Chin Pawlpi Kalay khalin ti theitawkin, mino tlawmngaipawl, le sumpai siangzet in a thawhtu pawl thawn tanlaknak an nei rero. Cumilakih lungawium zet cu mina thlihip ding hrang Oxygen bur pawl leinak le a tulpawl hrangah zemsuahnak an nei vivo. Central Chin Pawlpi cun a theitawk suahin mina le natcek duhpawl cu bawm vivo a tum. Tui dinhmun vek asile Central Chin Pawlpi cun Oxygen burte 76 leng, burpi 60 leng, le PPE hnipuan 600 leng an nei zo ih tirhsiang zet ih petu pawl hamngin a pung vivo ding ruahsan zet a si. Himi thawn pehparnak a tuahduhtu hrangah Salai Lalte 09425847485 le Salai Hnin Hnin 09400973218 pehtlaih theih ringring an si.
Kan tawn reromi Covid-19 natsia ruangah June 16 ihsin lairal tlang ah khualtlawng suat lut sian a si nawn lo. Himi lock down ruangih ei-in, bufai harsa le tlasam kan um pang a sile khawtin ih lal hnen lole LMP hruaitu hnen theihter ding a si hleiah siat-ni that-in khal ah a hlan vekin a burpi umtlang lo dingin sawmnak an nei cih fawn tiah kan theihmi ka run lo than.
Tualsung le Kawlram buainak ruangah Mizo ram lam panin kan Chinmi tampi mai himnak hawlin le ral kian dingah an so hai. Mizo ram khalin kan thisen zawmpi an si e, ti in zangfahnak le lainatnak thinlung thawn an rak cohlang ve ruangah Champhai, Farkawn, Zokhawthar le hmun dangdangah mipum 1300 hnakin mallo umih rel a si. A suak le a lut an um rero lai ruangah a dik ciah ih mipum siar a theih loh nan, khawtin YMA cun an thei tawkin an tawl relih raltlan hrang bawmnak an ngahmi pawl khal an zem suak rero a si. Cutlukin mai unau tiin an rak zoh rero lai ah ralkian mipi then khat cun mizo ram dun le dan thlun lo in mai duhduhih rak nung duh mai an um ruangah YMA hruaitu lam cun an dun le dan thlun hramhram dingah an ngen hai a si tiah kan thei. “kan unau pawl harsatnak an tawngih buaipi ding cu kan tuah ding rori ah kan ruat. Cuti cing cun anmah Mizoram ih ratlan pawl khal an duh dandan in ummen loin dun le dan kan tuahmi pawl cu thlun dingah kan sawm nawn sal duh. Raltlan tlung le lut lakah rittheih sii rak phur thup tivek an um vivo tla cu tha kan ti lo tuk. Curuangah raltlan tlungsal ding pawl khal duhduh menih tlung loin YMA hruaitu pawl hnenah sim haisehla YMA kuthnuai in tluangten an tlun ding cu kan duh. Raltlan pawl hrang bawmnak kan dawnmi pawl khal theitawkin raltlan pawl umnak hmunah kan zem vivo. An umnak hmun ciar cu theitawk in kan ngaihsak ih kan buaipi a si,” tiah Champhai YMA cun a sim.
Chin ramkulh CM hlun salai Lian Luai khal ralkap kutin a him vivo nak ding hrangah Mizoram lam a thleng thu kan thei. Pu Lian Luai hi kum 2015 rampi hrilawknak ah NLD parti in Falam peng sungah nehnak a rak co ih Chin ramkulh Chief Minister a hung tuan dahtu khal a si. Kum 2020 hrilawknak khalah NLD in a tling sal nan, ralkap in uknak a lak ruangah tu vek dinhmun a cannak a si.
Ramleng thuthang:
UK in kum tinten ramdang ram farah pawl bawmnak a pek theumi a let 30 zatek in a thum. UK hi kawlram telin ram farah ram 45 lai hrangih thansonak dingah G7 sung ihsin a thawh tam lam a si theu. A ram lakluh sung ihsin zatek 0.7 % hi ramdang bawmnak ah a hmang theu. Tucu zatek 0.5% ah a thum ruangah raltlan Refugee pawl hrangah le ram farah pawl hrangah ziang tiang siatphahnak a suah thei ding tiih ruah rero lai a si.