Lairam Deirel Arsi Rev. Nung Kam ih Thuanthu

Laitlang/Lairawn ih um cun kan theih thehmi, Pathian mihman Rev. Nung Kam hi tui kan san thangthar nonawnpawl hin kan hngilh vivo thlang a bang. Amah hi Lairam Deirel Arsi tiih theih laar zetmi a si ih kan Laimi ah Bible zirnak lam khalih mi hmaisa a rak si.

Rev. Nung Kam hi, Pu Thang Sam le Pi Luah Men Sung tei fapa neihsun a si ih February 6, 1930 kum ah Falam peng Khawlung khua ah a suak. February 26, 2008 ah a renmi a Pathian hnen ah in cawlhsan. 1945 kumah khan Pathian a awi. Pathian a awi hnu ihsin Falam ih RC siangbawi, France mi hnenah a um ih, cui siangbawi cun a vaknak hmun kipah a hruai vivo theu. Vawi khat cu cui siangbawi kha Mandalay a tlawn sungah, ‘Na duhduhah rak vak aw’ a ti ruangah Zongte, Darteti, Khawlung, Cerhmun khuapawl ah a rak tlawng vivo.

Zongte a thlen tikah Rev. Lal Zik hnen ihsin NEIG cabu suah mi Thuphuan hrialhfiah, a bikin bung 13-17 ta a siar ruang ihsin nun danglamnak a nei. Cui sin RCM rindan dik lozia a hmu suak ih, 1956 in Manipur Kangvei ah Rev R. Dela Memorial Bible tlawngah Bible zir in Bible tlawng a rak kai.. 1954 in Pathian hna a rak tuan thok zo ih Kum 1959 ah Bible zirnak Diploma a rak ngah hnu ah 1959 ah Reverenced Ordained a rak si ih kum 1964 tiang I.C.B Kawhhran ah Pathian hna a rak tuan.

ICB cu an thenawk ruangah Pu Lalthanlian-ih kaihhruaimi E.F.C.M ah a um. Cuisin Selawn ah kum 19 sung, 1982 tiang a um ih Falam ah a thawn sal, pastor hna cu kum 47 sung rinum tei a tuan hnuah 2006 kum ah  khan E.F.C.M cun full pension a pe.

Kum 1966 kumah Dawn khua-ih Pastor Thang Ve-ih inn ah Oswel J. Smith-ih cangan, ‘Ni khatkhatah cun Oswel J. Smith cu a thi ti nan thei ding. Asinan ka ca ngan mi cu a thi dah zik lo’ ti mi a siar ngah ruang ihsin calai lamih hnatuan duhnak thinlung a nei thawk. Cuisi cun, ‘Mizoram, Manipur le Chinland rampawlah cabu million khat ciar phurhsuah ih, phurhlut ka tum ding’ tin thutiamawknak a tuah.

Lairam Deirel Arsi ka si a ti vekin anih vekih calai hnatuan paih kan um lo vekin, kan um nawn khal kan zum fawn lo. ‘Ka dam sungah a malnak bikin cabu maktaduai khat tal cu Mizoram, Manipur le Kawlramah ka phursuak ding ih, ka phurlut fawn ding’ tiah thutiamawknak a tuahtu Khrih hrangih pacang tha kan ramin kan neih mi pakhat a tling a si.

Amah hi 2006 kumah khan full pension-in a pension nan, calai hnatuan cu a cawlhsan thei cuang hrimhrim lo. Cabu a suter, a ngan, a la khawm, a phur darh tiin hibang ram thum pawlah a vak ringring. Kan ramin amah vek mino, calaiih zuam si, a zuar lam paih fawn, mi dang kan neih theinak dingin Pathian hnenih kan dil tla a tul zet ding. Kum 2008 February thla ni 26 ah khan Lairawn Vutbuak khuaih cabu zuar rero lai cingin mual in liamsan ta a si.

Rev. Nung Kam hin fapa 3 le fanu 3 a nei ih tu 2 hmel a hmu ta, Rev. Nung Kam hi Pathian ih in rundamnak maksak thu le Jesui’ ratsalnak thupawl uar zet tu a si. Pathian ih in rundamnak hi kumkhaw daih a si zia le a hloh theilo thu phuang uar zet tu khal a si. Mithen in a tumtahmi le a fehpi dan theithiam loin Pathian ih in rundamnak maksak a hloh theilo thu a sim mi pawl tla hmuhsuam le hnihsuah ih an relsak men hi a pawi ngaingai mi a si.