Malaysia ah Chinmi Zualko; Siat Tawng

Tufang kan leitlun boruak ṭhalo le duh umlo zet karlak ah Malaysia ah thih hlohnak kan tawng cu a pawi nasa. Lai Christian Fellowship (L.C.F) member le LCF Nubu member a simi Pi Sang Hlei Tlem, kum 48, (Cicai khua) cu Thithlum le Thinthling natnak ruangah mizan (April 13, 2020) zan nazi 11:57PM ah Hospital Kuala Lumpur ah mual in liam san.

Pi Sang Hlei Tlem hi tuihlan ihsin rak damlo zo a si ih, Zarhte sun (April 11, 2020) ah khan a damlonak cu a luar sinsin ih a zan ah Sizungpi ah fehpi a si. Tufang boruak thawn sizung ah zan riakpi a theih fawn si loih amahte sizung ah zan a riak, Sizung ih a fehpitu a fanu khal inn ih tlun kirsalnak dingah zan sim hnu a si ih Taxi service a um nawn fawn lo, inn tlung theilo, sizung sung khal ah lut thei nawn loin lengah khawvang tiang a to cuahco men.

Cutin sizung ah zan hnih a um hnu, April 13, 2020, zan nazi 11:57PM ah a nunnak a cem. Pi Sang Hlei Tlem hi Malaysia ih Lai Christian Fellowship ah Nubu member a si. Pasal fate thawn Malaysia ih um an si, Fanu pahnih le fapa pakhat a tanta.

Pi Sang Hlei Tlem in Malaysia ah mual in liamsan tiin ninghang ih um rero lai ah, an khua ih um a ṭapa, Pu Hmun Nei Sawn (kum 50) khalin tuizing (April 14, 2020) zinglam nazi 9:30AM ah mual in rak liamsan ve. Tulai fang ah an unau hnih ten lei harsatnak suahsan in mual in liamsan cu an tantami tefa pawl le sungkhat unau hrangah tuar a har zet ding. Thlacamnak thawn kan mah le umnak ciar in kan mang cio kei uh.

Malaysia ih in liamsantu Pi Sang Hlei Tlem ih ruak hi Malaysia ram ih vui ding maw, asilole, Kawlram ih phurh ding timi a fiang hrih lo. A ruak khal hi acozah lam in tulai natnak CORONAVIRUS a um le umlo an check ta dingih cumi result a suak hnu ah, Coronavirus nathrik a umlo asi lawngah lak theih a si ding.