U Win Htein In Senior General Min Aung Hlaing Ih Thuhla A Sim Mi Cu NLD In Kan Theihpi Lo

2008 daanhrampi remnak ah atui ralkap lu bik Senior General Min Aung Hlaing ih a kaihruai ahcun a ralai dingmi rampi hrilawknak ah President sinak a naih phah ding tiah NLD hruaitu pakhat U Win Htein ih simmi cu NLD ih theihpimi a silo thu July 3 ih tuahmi NLD central meeting theh hnuah NLD Vice Chairman Dr. Zaw Myint Maung in simnak a nei.

“Himi cu NLD ih ruah dan a si lo, NLD ih ruah dan a silo lawlaw, kei tla cu a theih khal ka thei lo, cumi cu ka tiam aw rori, na suhmi cu NLD policy a si maw timi si ko, a silo lawlaw, cucun a fiang ko sisi” tiah Dr. Zaw Myint Maung in a sim.

Daanhrampi in rem sak asile President na tuan ding tivek ramkhel pekawknak phun kan tuah ding a silo ih NLD cun a hlan policy khalah cuvek kan ruat dah lo tiah Dr. Zaw Myint Maung in a sim bet.

NLD hruaitu pakhat U Win Htein cun BBC thuthangca thawn June 20 ih thusuh-awknak an neih caan ah daanhrampi remnak hrangah Senior General Min Aung Hlaing in in hoha a si ahcun a ralai dingmi rampi hrilawknak ah President a si theinak dinhmun a tampi tiah a rak sim.

NLD acozah cun a thutiammi 2008 daanhrampi remnak cu 2019 ah ramdinkhawm tlangsuak thurelnak hmun ah thuburnak a nei na’n ralkap lam in an dinpi lo ruangah an rak hlawhtling lo. Curuangah daanhrampi remnak cu neta acozah term khalah kan zuam ding tiah Dr. Zaw Myint Maung in July 3 ah thuthanglatu pawl hnenah simnak a nei.

A ralai dingmi rampi hrilawknak ah Senior General Min Aung Hlaing cu ramkhel ah a luh thei thu Russia hrambun Arguments and Facts thaw’i an tonawknak ah a sim. Senior General Min Aung Hlaing cun Arguments and Facts thaw’i an tonawknak ah “ukawknak lam hmuhtonnak tampi ka nei” tiah a rak sim.

A ralai dingmi rampi hrilawknak ah Senior General Min Aung Hlaing dinhmun in khuitawk bik ah a tel tum timi thusuhnak an tuah tikah ‘tuihlan hrilawknak bangtukin zalen zetih a dikmi hrilawknak a si ding hi hmaisabik ah a thupit thu, cumi hlawhtling dingin ralkap lam in an bom ding thu simnak a nei. Cuihleiah hrilawknak result a suah tikah hrilawknak ih teltu party pawl, pawlkom pawl, mipi duh dan ah thum aw in hnatuan a sunzom ding thu ralkap in thuthang an suah.

Kum 64 ih upa ralkap lubik Senior General Min Aung Hlaing cu tuikum hrilawknak theh ah rampi President si dingin thinlung a nei tiah Myanmar ramkhel zingzoitu mi tampi in an zum.

Senior General Min Aung Hlaing cu 2016 July thla ah pension lak dingin kum 60 a kim ih, amai duhdan vekin pension a la ding tiah rak zum zetmi a si ko na’n ralkap lubik sinak term cu ralkap daan bangtukin tiah sim tahratin a rak than/karh ter. Ref : Irrawaddy