2020 Hril-awknak Ahhin Ramțhen Pawl Ah Nehnak Co ding kan tumtah; UBP chairman

Thura U Shwe Mann in hohami Union Betterment Party (UBP) dinhmun in 2020 hril-awknak ah ramțhen hmun tam sawn ahhin nehnak co dingah tumtah a si thu Thura U Shwe Mann in April 8 ih Naypyitaw a inn ih tuahmi thuthang simfiangnak ah thuthang latu pawl hnenah simnak a nei.

“2020 hril-awknak ahcun party dinhmun in ramțhen hmun tampi ah nehnak co dingah tumtah a si, ramkulh cu a tel lo, ramkulh cu tlangpar miphun pawl anmah in nehnak co dingah ka duh sak, a caan hi kumkhat luan fang lawng a si ding na’n dik zet in thaten kan țuan ahcun nehnak kan co ko ding” tiah Thura U Shwe Mann in a sim.

Union Betterment Party (UBP) hi 2020 hril-awknak hrang timtuahnak ah kumkhat luan fang lawng caan a nei na’n fel zet le dik zet in tuah ding a si thu a sim bet.

Union Betterment Party (UBP) hi election commission in April 4 ah party din theinak a pek. UBP ih hotu bik cu Thura U Shwe Mann a siih hotu sang ah tuihlan ramsung tlangbawi zung ih tlangbawi pahnihnak U Bone Shwe a si.

Thura U Shwe Mann cu ralkap sanlai ah bochukgyi a rak siih 2010 ah senpi tlangsuak chairman, USDP chairman, atu NLD acozah san ah daan lam thuhla hleice zohdiktu commission chairman pawl țuanvo a kai.

Union Betterment Party (UBP) ahcun ahlan ih acozah upa pawl le tlangsuak palai hlun pawl an tel tiah theih a si. Ref : AKT