Phunhra Tlawngta Nute Lungto In A Rilh That

March 15 ih tlangpar ih lungto ril cun phunhra tlawngta nute a ngah ruangah siizung an fehpi sina’n a hriamhma tuar thei nawn loin tuamhlawm rero a si laiah a nunnak a cem thu Karen ramkulh palik zung lam in an sim.

Phunhra tlawngta nute hi Chaihmazaw peng Ping-ne-kung khua ih phunhra tlawngkai kum 16 mi Ma Myint Myint Thu a si.

“Lungto in a lu a ngah ih a hriamhma tuamhlawm dingin Yangon ih thluak thahri lam tuahnak siizung ah fehpi in tuamhlawm rero a si laiah a nunnak a cem” tiah ramkulh palik bawi in simnak a nei.

Thihnak tongtu tlawngta nute hi kum 16 lawng a si hrih lai ih phunhra camibuai an phit thluh hnu March 13 ah Karen ramkulh Hpaan khawpi ih Yatihpianku an feh laiah ruahnak in pi 40, 50 tluk hrawng a sang mi tlangpar ihsin lungto a rilmi cun a ngah tiah palik ngankhummi bangtukin theih a si.

Karen ramkulh palik bawi in “hmaisa ah Hpaan siizung ah kan fehpi, Hpaan siizung ah tuah a theih lo ruangah Yangon kan fehpi sal, asina’n a nunnak run theih a si nawn lo” tiah a sim.

Tlangpar ihsin a rilmi lungto hi Ungti tia hrawng a siih lungto rilh ngah ruangih thihnak hi Yatihpianku ahhin tuihlan ah a rak um dah lo tiah theih a si. Ref : PNJ, MML