Myanmar Palik Pawl Zirhnak Pe Nawn Lo Ding Ah EU An Forhfial

European Union (EU) ih Myanmar palik hnenah zirhnak a pekmi cu cawl dingah British ih hmunkhuar Bur-ma Campaign UK cun dilnak a neih thu theih a si.

February 12 ih General Aung San zuk lem țhawn ding thuhla ah Kaya mipi pawlih lamzawhnak cu palik pawlin rabar cerek thawn kap tahratin le meithat tidai pipe thawn mipi an tuahmawh ruangah atu bangtukin zirhnak pe nawn lo ih cawl dingah a dil/forhfial thu Bur-ma Campaign UK cun a thusuahmi ah a langter.

European Union (EU) cun milai covo pahbaltu palik pawl cu Europe paisa 30 million hmang in Myanmar palik pawl zirhnak a nei ti’n Bur-ma Campaign UK in a ti. Himi bomnak paisa ih milai covo pahbaltu pawl va pek hnakin ralkap pawl pek sawn ding tiah a tarlang bet.

“European Union (EU) cun Myanmar palik pawl cu ramtamhuap daan le duun thawn mil aw-in zirhnak a nei, thungai te ti ahcun a hlawk khal a hlawkpi zet, himi zirhnak cawlhsan ding a si ahcun Myanmar palik pawl cu hlanlai san bangin cangvai dingah in duh si pei maw timi hi thusuh ding a um” tiah European Union (EU) ih palik a zirhmi ah caan reipi a rak țuansuaktu palik pakhat in simnak a nei.

European Union cun Myanmar palik pawl cu 2014 ihsin Myanmar palik pawl thiamnak sangsin dingah mipi tongkhawm aw țhendarh dan ding thuhla ah khawkhan dan ding le emergency ih kilkhawi-awk dan ding pawl zirhnak a nei tiah theih a si. Ref: 7D