Acozah le Tlangsuak Palai Pawl In Mipi An Hmu Nawn Lo : Win Myint

Acozah department țuanvo neitu pawl le tlangsuak palai pawl cu hnațuan pekmi rank parah an nuam aw tukih mipi pawl cu an hmu nawn lo tiah rampi president U Win Myint in simnak a nei.

March 21 ih tuahmi Kachin ramkulh Myitkyina peng department tinkim le acozah upa pawl, tlangsuak palai pawl thawn tonkhawmnak hmun ah rampi president U Win Myint in atu bangtukin a sim.

“Hihi American president John F. Kennedy ih a rak sim țheumi a si, ka sim duhmi cu rampi in ziang in tuahsak ding timi hnakin rampi hi ziangtin kan tuah ding timi ruah a țul tuk zo, mi hrekkhat cu hnațuan neih thei ruangah, huham neih ruangah hnațuan pekmi țha zet le dik zet ih țuan ding hnakin nun nuam zetin an um men, țuanvo petu mipi rori khal an mit in an hmu thiam nawn lo, rank an duh, acozah lam khalah, tlangsuak lam khalah nuam zetin an nung men, hitin ka sim hi ka nuam aw lo zet, nun nuam zetin um lo ding ka ti duhnak a si lo, kan ram hi democracy system hram a hnget khoh zo maw, milai covo ngahnak lam ah teh a hnget khoh zo maw, cu pawl an hnget khoh tikcu caan ah nuam zetin um uh, atu cu cuti a si lo, atu caan ah nuam zetin nan nung men asile a feh reromi thleng-awknak timi cu ziangtik hmanah sualsuah, hlensuah a theih lo ding” tiah president U Win Myint in a sim.

NLD in 2015 election țum ah election hrangah a thehlarmi cu mipi pawl nuntu khawsak dan țhangso ding, daanhrampi rem ding, ramsung remdaihnak tawlrel ding, miphun lungput nei in hmunkhat ten hnațuan tlang ding timi pawl țuan suak dingah rak aupi a si.

“Democracy system ih feh tikah mipi in kei hi țuanvo in pek, upa dinhmun in nuam cen dingah a silo timi ralring thiam uh, ram pumhuap minung million 50 lenglo in thutluknak an tuah thei lo ruangah himi hi țuanvo lo pekmi nan si, ziangruangah, uk-awknak timi cu mipi lam ihsin a ra suak mi a si, mipi ih țuanvo pekmi nan si” tiah president in a sim. Ref : AKT