Central Acozah Lawng Hi Rinsan Hlah Uh : Daw Suu

Mon ramkulh Mawlamyang khawpi ih mipi tonkhawmnak hmun ah rampi thuron petu Daw Aung San Suu Kyi cun central acozah lawng hi rinsan hlah uhsi tiah simnak a nei.

“Mipi lam hi malten theihternak ka lo pe duh, central acozah lawng hi rinsan tuk hlah uhsi, democracy kan duh a si ko lo maw, democracy kan duh asi ahcun pakhatnak ah mahlemah rinsan awk ding, kan țuan thei tawk kan țuan ding, daan ih a huapmi sungah dik zet le fel zetin kan țuan ding, ramțhen le ramkulh thawn a pehparmi thuhla hi ramțhen le ramkulh lan tahratin central in in relsak uh ti vek hi kei cun thazang ka pe lemlo” tiah Daw Aung San Suu Kyi in a sim.

Federal democracy kan din duh ngaingai ahcun ramțhen le ramkulh acozah khalin an hna hi neh zet ih an țuan a tul timi khal a sim cih.

Daw Aung San Suu Kyi le mipi tonkhawmnak hmun ih mipi lam ihsin an harsatnak an sim tam bik mi cu tidai khop kham ten ngah ding, lamzin pehpar-awknak lam, electric meisa ngahnak lam, loram thuhla pawl an si.

Mipi ih thusuhmi pawl cu department tin tuanvo neitu pawlin simfiangnak an nei ih thusuhnak tuah ngahlotu pawl khalin zuarnak ca an thehlut.

“Ramkulh acozah thawn a pehpar ruangah ramkulh acozah ah kan zuar, zianghman in tuahsak lo, rampi president hnenah kan zuar sal ih danglamnak a um lo, atu Daw Aung San Suu Kyi hnenah kan zuar sal” tiah loram thuhla ih ca thawn zuartu Chawngsone peng mi pakhat in simnak a nei.

Rampi thuron petu Daw Aung San Suu Kyi le mipi tonkhawmnak ah mipi 1500 lenglo an suakkhawm tiah theih a si. Daw Aung San Suu Kyi cu April 4 ah Mon ramkulh a thleng ih Mawlamyang khawpi ah mipi tonkhawmnak a neih hnuah senpi siizung zohnak a nei. April 5 ahhin Thațhung khawpi ih mipi thawn tonkhawmnak an nei ding tiah theih a si. Ref : TST