Vice President Thu In Hakha – Hman Daw Lamzin Tuahnak Hrang Ramkulh Paisa 1 billion hmang ding

Chin State cozah hnaṭuan dan thuhla rel theitu, Municipal chief U Soe Htet cun, Rampi Vice President U Van Ṭhio ih thupek vekin Chin State khawpi Hakha le Sangaing Division ih Hman Daw khua karlak lamzin tuahnak dingah Chin State cun Budget 1 billion Kyats a tuah ding thu le, hi lamzin hi co-u pek ih tuah loh li ding a si thu a rel.

Municipal Chief U Soe Htet cun, “Vice President in in khih hmuhnak vekin State cozah budget ihsin 1 billion hrawng kan hmang. Tu hi cu khaw fur ruah ti tam lai tak a si ih, nan, hmun then khatah cun hnaṭuan kan thok tho tho. Ruah ti a hung ko tik cun hmun tin ihsin kan ṭuan thok cih ding. Tu kha hi lilawn tuahnak ding thir thilri pawl an thiar rero zo,” a ti. Hi lamzin hi ṭhal sung ih feh theink ding a si ih, budget a rung tlak bet tikah ṭha teih lung phah ih tuah ṭhat ding a si.

Municipal Chief U Soe Htet cun, “State cozah budget ihsi cun ṭhal sung fehnak ding lamzin lawng kan tuah thei ding. Budget a ra tlun hmaisabik ah ṭha ten lung kan phah sal ding. Tu hi cu lamzinpi kel lawng a si hrih. A karlak ih lilawn pawl tla kan tuah cia thluh ding,” a ti. Asinan, himi Hman Daw lamzin hrang budget hi state cozahin ziangzat ciah so a hman ding ti hi dik rakin a rel theih loh, tiah Transport lam hotu U Sui Ṭhio cun a ti.

U Sui Thio cun, “Vice President ra tlawn lai khan hi lamzin hi co-u pek dingmi ih in timi a si. A si dan takah cun lamzin pi thar ceh bet ding cu mal lai lawng a tang thlang. Lamzin um cia hi kan tuah ṭha ding. Curuangah, sumpai kan hman ding zat hi a rel cia theih loh,” a ti.

Chin State, Hakha khawpi le Sagaing Division ih Hmandaw hi pehtlaihawknak ah a nai zet. Tu ih an tumtah vek ah cun peng 66.5 ih sau, a kauh lam pi 30 in an tuah ding ih, ṭhal caan ih lamzin feh theinak ah an tuah hmaisa phawt ding. Chin World by Credit: Salai C Lian