Chin Hminthang Tertu Esther Dawt Chin Sung le Benjamin Sum
Tufang cu putar, pitar, nauhak upa tiloin Myanmar Idol ih buai a si cio. Tuihlan ah Myanmar Idol hin kan Chin mipi in rak tham banlo nan, tuiṭum cu kan Chin mipi lawng siloin Myanmar rampumhuap a hngawr rori cu si ko. Online vun bih veten Esther le Benjamin Sum ih thuhla in hmun a luah khat thluh zo.
Tuiṭum Myanmar Idol Season 4 zuamawknak ih kan Chinmi kan nau le pawl lak ihsin Esther Dawt Chin Sung le Benjamin Sum hin kan Chin hmin an thangter hleice. Kan nau le dangpawl khal an thiam lawlaw, Myanmar rampum huap zuamawknak ah Top 10 sungah Chinmi minung 3, 4 an telve timi cu a rak um dahlomi a si.
Zuamawknak an thawktir ihsin mizan (November 15, 2019) tiang zoh tikah, Judge pawlin siseh Myanmar mipi ziangmawzat khalin Esther le Benjamin tei’ pahnih hi an uar hleice. Kan Chin miphun lak ihsin hivek dinhmun a thleng theitu kan nau le pawl hi suan an um lawlaw si. Zo a thiam sawn timi khal hril anhai rori an si.
Myanmar Idol Season 3 lai ah kan Chimi Nilen a rak telve ih Top 3 tiang a rak thleng ve. Tuiṭum zuamawknak ah hin kan Chinmi a tel an tam ruangah mipi lamin thapek dan kan thiam cu a thupi tuk lawlaw. Thapekawk dan kan thiamlo pang asile, hnam dang pawl hrangah chance ṭha tuk a rak si pang ding.
Curuangah kan Chin hmin ṭhatertu kan nau le pahnih Esther Dawt Chin Sung le Benjamin Sum hi dirthlatu le an thanau dingih sawisel le mualphohtu siloin sawmdawl ih khaiso vivotu kan si a ṭul. An ti ṭhatcan ih lawm le pawrh a ṭhat vekin, an ti fuhlo can le an thanau can ah dinpi le thazang pekih ṭannak hin an nun a ti pitling in a ti cak sawn a si.
Anmah pahnih hin kan Chinmi lungput alangter ih ziang dinhmun ah kan ding timi an langter. Kan nau le pahnih hi an thiam tuk lawlaw; zuamawknak ih teltu midang pawl hnak khalin an cungcuang sawn a si.
Hnamdang pawlih rak ngai nuamlo khawp le anmah VOTE le ṭan duhnak hlohphah ding khawp in aukio tuk cu a fuh ciah lo ding. Chinmi cu zate khat fang kan si kha, ṭhenaw thei kan silo, hla-aw thei khal kan si lo. Ṭanrual nakcang kan thiam ding a thupi tuk a si.
Myanmar Idol Season 4 3rd Week Zuamawknak Video Part 1;
Myanmar Idol Season 4 3rd Week Zuamawknak Video Part 1;