Iran in Rocket 15 Rori thawn US A Kap Taktak Thlang, US in Ziangtin A Lehrul Ve Pei?
Donald Trump: Iran in US Ralkap Thlaphang ih A Umter Asi ahcun Iran ramih hmun 52 kan kap ding
Tufang kan leitlunpi in a buaipi bikmi le lungphanza ngaingai a simi Iran le US karlak ih buainak cu a sosang vivo. Tuizing, January 8, 2020 khawvang hlan, ah Iran cun Iraq ram ih ṭanhmun khuar, US ralkap pawl umnak cu Rocket thawn a kap ciamco ih US ralkap cu zohman hliamtuar le mithi an umlo tiah US president Donald Trump cun a tarlang.
Iran lam hin rocket 15 rori thawn an kap ciamco ih, rocket 10 cun US ralkap ṭanhmun khuarnak lam siloin Al-Assad Vanzam ṭumhmun lam an kap ih, rocket pakhat cun Erbil ralkap ṭanhmun khuarnak a kap, a dang rocket pa 4 pawl cu kap ngahmi neilo in a tlawlh tiah Fox News cun a tarlang.
The Pentagon ih simdan vek asile, Iran hin rocket 2,000 hnakih tam an nei tiah a sim. US president Donald Trump cun Iran in US ralkap a thlaphang ter pang asi ahcun Iran ram ih hmun 52 kan target zo, zamrang zet le rapthlak zetin kan kap ding a si, tiah a sim.
Tuiṭum Iran in Iraq ramih US ralkap ṭanhmun khuar nak rocket 15 rori thawn a kahnak ah US lam cu mithi le hliamtuar an um loih an zaten an him thluh thu theih a si. President Trump cun “Ziangkim a ṭha thluh. Iran in kan ralkap ṭanhmun khuarnak hmun hnih rocket thawn a kap. Ziangkim a ṭha thluh. Leitlun ih ralkap thazang cakbik le ralthuam ṭhabik kan nei. Thaizing ah thusuah ka tuah ding a si” tiah amai’ Twitter ah a tarlang.
Iran le US karlak thubuai hi tuihlan kum reipi ihsin a rak thawk zomi a si. Tuiṭum ih thubuai hitluk a sosannak sanbik cu, Iran ralbawi bik Soleimani cu January 3, 2020 sun ah khan Iraq ram ih a fehnak ah US cun Drone (mawngtu neilo vanzam) thawn an kap ciamco ih cutin Iran ralkap bawibik cu a thi. Cumi ihsin thuhla sosang vivo mi a si.
Iran ralkap bawibik Soleimani hi US duhlotu le dodal zettu a si ih, Iraq ram ih US ralkap ṭanhmun khuar pawl khal tapung pawl hmangih rak do ringringtu a si. US in cui’ Iran ralkap bawibik an thah ruangah Iran cozah cu US parah a thinlingnak a nasa sinsin ih cutin tuizing ah rocket 15 rori thawn a kapnak san a si.
US in ziangtin a lehrul ve ding timi cu leitlun mipi ih thlir cuahcomi cu a si ko.. Video zohduh hrang a hnuai ah zoh theih;
Iran in US a kah lai Video 1;
Iran in US a kah lai Video 2;
Source: CNN, Fox News