US President Donald Trump Hnaṭuan Suah Tum Thuhla ah Nehnak A Co Sawn Riangri

Tuizing khawvang zawngah khan US Senate cun Trump cu ‘Sual Nei Lo’ tiin an vote. Cutin President Donald John Trump cu a hnaṭuan ah a um peh vivo thei thlang ding.

SENATE VOTE: US Senate hi Upper House a si ih kan ram ih Amyota Hluttaw vek deuh a si. US state 50 ihsin palai 2 cio an thlah ih Senator 100 an um. House of Representatives an ti mi Lower House in US President cu thil sual tuahih hlawn ding an timi cu Senate in an rak rel dingih vote 3/2 lole vote za ah 67 in hlawn dingih an vote lawngah President cu a hnaṭuan ihsin hlawn ding a si. Tu cu President Trump an puhnak(1) Thuneihnak hmang sual timi ah vote 52-48 in thiam a co ih puhnak (2) Congress zingzawinak a kham timi ah 53-47 in thiam a co. Hlawn dingih vote 67 ṭul mi ah 47 lawngin an lungkim pi a si.

MITT ROMNEY: Mitt Romney hi Republican party ihsin thuneihnak hmangsual tiih thiamlocotertu umsun a si. Anih hi Massachussetts Governor hlun 2012 kum ih Obama nehlotu a si. Mormon kawhhran a si ih a zumnak dik le diklo cu thukhat si sehla Conservative ruh takih ruah mi a si. Ziangtin Trump hlawn dingin a vote thei?

Theih cio vekin 2016 hrilawk zik khan Trump cun Washington ih politic hnawmhne hmuahhmuah ka thianfai ding a ti tikah Democratic lawng si loin Rebuplican hotu tampi in napipiin an vua a si kha. Cupawl lakah Bush sungkua, McCain, Jeff Flake, Kasick, Ted Cruz, Graham le Romney khal an tel. Trump khal cun a kick back ve hai thluh. Hrilawknak a thlen cun Ted Cruz, Lindsay Graham le McConnel pawl cun Trump ṭhaten an ṭuanpi nan a dangpawl cun huatnak le halhsiknak in an khat lai.

Romney tla cu Trump a tlin veten Secretary of State(Foreign Minister) beisei in Trump Tower ah a leng leuhleuh a si kha. Asinan Trump in cuih dinhmun a pek lo tikah a dosal ciamco. Twitter khalah ‘Decleto’ timi hmin lem thawn Trump a ṭhua ringring timi 2019 ṭhal laiah khan an hmusuak ih a mualpho nasa. Tu hi Utah State ihsin Senator a si. (Pastor Sangte tei milai) 2018 hrilawk khan Trump in a dodal lo ruangih tling thei a si.

Republican ah zohman Trump dodal cingih dingsuak thei an um lo. Tu khal CPAC timi Conservative Conference ih an sawm cia an hnawlsal zo. Cun Utah state ah mipi duhdan kalhih Washington ih hnaṭuan MP kawhkirdan ding Dan an tuah rero zo. Cun GOP ihsin dawi ding khalin an au nasa zo. Republican ah hin Trump thlawptu hi 95% lenglo an si ih Romney bial Utah ah Trump duhtu 60% lenglo an si. Romney hi Hollywood le Media fak hlawh duh menah hitin thil a tuah ti a si.

WITNESS THU KHA: Senate Trial laiah khan Dem lamin thutheitu kawh bet an duh nan Republican lamin an duh lo. Vote an thlak tikah Rebuplican in an neh. Court ih thutheitu um lo tiin hrekkhat cun an sawisel. A sinan taktakah cun House Impeachment Manager 7 in case an run ken laiah khan, ‘a sualnak a fiang cia’ an ti a si kha. House ah Ni 78 a sual an hawl zo. Thutheitu 17 anmai duh mi an ko ih Republican thutheitu pakhat khal kawh an rak siang lo.

Document cahmai 28000 lenglo an zoh zo. Democrats lam cun Trump huatu, hnaṭuan a hlawn mi ihsin a tisual hawl buai rero ih a zahumnak tisiatsak in 2020 hrilawknak ih neh an tum mi a si. Hihi thil tenum tak a si. Asinan Republican lamin an theih tuk ruangah thutheitu ko bet loih ṭheh lohli an duhnak a si. Cutin Mitt McConell ih rule tuah mi an thlun.

SENATE MAJORITY LEADER MITT MCCONELL RULES: House Impeachment Manager 7 le Trump Defense Team in nazi 24 veve, a zate kawmin nazi 48 cu case present le defense nakah a si ding. Cun nazi 16 cu Senator-pawl hnen ihsin thusuhnak a si. An thusuhnak cu cate ah an ngan dingih Presiding Officer an timi khawmhruaitu Chief Justice John Roberts in ring zetin a siar ding a si.

An suh mi cu Impeachment Manager lole Trump Defense Team in an sang ding. Cuih hnu ah Senator pawlin nazi 8 sung an elaw ve ding. Cuih hnu ah sualpuhtu lamin nazi 4, thiamthu rel lamin nazi 4 sung tlangkawmnak rel can an nei dingih netabik ah February 5, pm(ET) ah vote an thlak. Tuizing ta kha.

ZIANGAH TRUMP HITIVEKIN AN PUH: America nunphung hi Bill Clinton san ihsin Liberal lamah a her vivo. Bush khal kha a conservative nak zawn a um nan Social liberal lamih heraw vivo cu a zoh liam men. Cun Obama-in kum 8 sung rori a kaihruai cun Mizoram lam danah ,”Thiang Zau” ah an cang thlang. Cucu Trump cun ‘Ka tuahṭha thluh ding, or ka linglet thluh ding’ a ti ruagah sualnak le bawrhhlawhnak acozah, court le media pawlih ṭan ringring ning lutuk Khristian Evangelical pawlin Trump an dinpi ih a tling a si ko.

Trump cun a thutiam vekin zumnak ruangih palbeh le hrem tuarpawl cu a run, White House ah Merry Christmas an tisal, thla an camsal, acozah hmun le tlawngpawlah thlacam a awnsal, dan loih ra lutpawl a thianfai, sumdawnnak a tuahṭha, IS hotu a that, etc…Hitivekih thilṭha tam lutuk a tuah tikah 2020 a tlinsal an phangih mawi le mawi loin hitin an cangvai a si ko.

Ngaingai cun Trump hriltlin a si ih a hnaṭuan a luh hlanah Impeachment ding tiin an au zo. President thutiam a lak ihsin nazi 17 ah Washington Post ah impeachment kan thawk ding an ti zo.

JULY 25 PHONE CALL: Hi hi impeachment-nak san bik an ti nan himi hlanah Democrat House member 157 in hlawn ding an lungkim zo. Impeach an tum cia ih puhmawh ding remcang an tuahcawp men mi a si. Hi Phone call hi White House cun Transcript a suah ih ziang mumal cu a um lo. Ngaingai cun VP hlun Biden le a fapa Hunter Biden sawnin thil an tisual sawn.

Ukrain oil company pakhat Brusima timi ah Biden fapa cu Board member ah an ret ih US Dollar 83000 thlakhatah a hlawh. Cumi cu Trump in Ukraine president hrilthar Zelsenky hnenah in zohsak aw a timi a si. Cucu Dem lam cun ramdang bawmnak thawn ramkhel khingpi vua an ti. Ngaingai cun Obama sanah hihi a dik lo tiih Ukraine Prosecutor in a rak zingzawi dah nan Vice President Biden in a zingzawitu nan hlawn lo ahcun bawmnak kan lo oe lo ding a rak ti. Rukrutu in Intek hrosal timi rori a si e.

Impeachment hearing, trial le media conference zon ṭheutupawl cun Democratic lam thuphan per le diklozia tampi nan hmu ding. Ahleice in House Intelligent Chairman Adam Schiff tla cu Committee hmaiah thuphan a siar tawp mai a si kha. Asinan CNN, BBC, Washington Post, New York Time tivek ah cun a lang lo ding.

STATE OF THE UNION: SOTU an timi State of the Union cu President in US Congress Joint Sessions ah kum khat sung a hnaṭuan ke a ṭuan vivo ding rampi hmaiih a sim mi a si. Tu February 4 zan khan President Trump cun Senate le House kawmaw, Supreme Court Justice pawl, Cabinet member le sawm mi mipawimawhpawl hmaiah thu a sim. A vung luh cun annrak ding. Cun a thusim ding mi ca cu Senate President, US VP Mike Pence le House of Representatives Speaker Nancy Pelocy hnenah a ap.

Pelocy cun cibai tumin a kut a suah. Trump cun a hmu lo maw, a cibai duhlo hrim maw, a cibai lo. Trump cu minute 80 lai can a hmang. A thusim cu a ṭha in a ropi zet. Thusim ṭheh an suah zawngah Nancy Pelocy(Democratic hruaitu) cun Trump thusim mi ca cu a thlek thluh. Anih cun cahmai kipah thuphan hlir a ti. Asinan Trump in a cibai lo ruangah a thinheng a si ko. US politic cu hivek men hi a si ko. Thulaknak: Lal Lian Zual, Naypyitaw