Ex-CM Pu Lalthanhawla in COVID-19 ruangih Delhi um Chinmi Raltlanpawl bawmnak hrang Ca Thehlut

Mizoram ah Chief Minister (Vuanzi) kum reipi rak ṭuan dahtu Pu Lalthanhawla cun, tuiṭum leitlun pumhuap ih tlangrai hri leng (Coronavirus) ruangah India ram cu kharpit (lock down) a si ih, kharpitnak ruangih harsat tuartu Delhi ih um Chinmi raltlanpawl bawmnak hrangah official in Mizoram acozah hnen ah Ca a thehlut.

A canganmi cu a hnuailam vekin a si. Mizo ṭawngih nganmi Chin ṭawngin lehlinmi a si.

To, The Chief Minister, Govt, of Mizoram, Aizawl.

Thupi: India ram hmun dangdang ih tangtami Mizo pawl le Delhi ih um kan Chin unaupawl bawmdan ding kan cozah hin ruat hnik sehla.

Ka pu: Tulai Covid-19 tlangrai in a hrinsuahmi Lock down ruangih India ram hmun dangdang ih a tangtami kan miphun Mizo pawl nitin ei le in tlasam ih harsa pawl, tlunnak hrang sumpai nei nawnlo pawl, le Delhi ih um kan Chin unau raltlan bawm ṭul zetzet pawl hi kan cozah hin bawmdan ding ruat lohli a ṭul in ka thei. Hnam dang lakih kan mualpho lo nak dingah kan cozah hin zamrang zetih tawlrel lohli a ṭha zet ding.

Lock down hi pehsunzawm vivo ding dinhmun ih um asi vekin zamran deuh ṭul zetin ka thei.

Hivekin Pu Lalthanhawla in amai’ bulpak hminpu in le an party hmin pu-in official takin an milesa men lawng mai si lo, kan unau an si tiin Chinmi hrang zawnruat ih acozah hnen ih ca a kuat hi a lungawi um nasa. Tuihlan ruah cun Mizo le Chin karlak ah unau awknak le naihawk sinnak a suak thei vivo ih lungawi um zetmi a si.

Pu Lalthanhawla hi Mizoram ih Congress Party siin tuihlan ah kum reipi Mizoram ih Chief Minister rak ṭuan rero dahtu a si. Netabik India rampi hrilawknak ah Mizoram cu tualṭo party MNF in nehnak nasa tak a co ih tui dinhmun ah Mizoram ih Chief Minister cu Pu Zoramthanga a si.