I Nahsiktu in Acid i burh ih ka Mit, Ka Hnar, Ka Hmai pawl ka hloh thluh…
Ka hmin cu Annika ka si. Kum 17 ka ti tiang cu hringnung pangai tak hmang vetu ka si. Kan tlawngah mi mawi lam ka si ih, ka tlangval Lewis thawn kan duhdawt awknak khal kan tluang in kan hlim nasa. Cucu tui dinhmun ahcun ka suangtuahnak vek men ah an cang.
Ziangah tile zan khat thil thu men ah ziangkim a danglam thluh. Lam zirnak ihsin zan sim hnu ih ka tlunnak lamzin ah mipa pakhat cu ka lam pan in a ra tlan ciamco ih balṭin khat in ka hmai ah ti I ra dawih.
I ra dawih pekte ahcun capoh awknak men a si dingah ka rak ruat, reilote ah ka hmai an hung sa hut-ho ih a luar sinsin, a tawp ahcun a thim thluh. Zing ka hung tho cu mizan vek thotho in ziangkim a thim thluh. Electric a ongawlo si dingah ka ruat, asinan thil danglam tak a um. Ka taksa parlam cu a na zet. Ka hmai ka vun tham cu ka mit le ka hnar an um nawn lo.
Ka hmai ka hun tham cu pizza vek ding khi a bang thluh. Ka Kaa ah awng fate a um ih cu tawk ihsin ka thaw ka rak thawi thei fangfang. Mizan ah khan siatsuah ka si hi maw, timi ka mangsuak. Tleu a um lo, ka hmai a um lo. Ṭah ka tum, ka mit a um nawn fawn lo. Mangbang in “Khui ah ha ka um, Khui ah ha ka um?” tiin ka au suak. Hmur um loih ṭawng cu a har nasa.
Van neih thlak takin, ka vawrh lam hna cu a rak ṭha lai ih thu ka thei thei lai. ?Na nungdam ko, Oh, ka duatte, ziang an lo ti saw?tiih ka Nui’ lungphang au aw cu ka thei. I pawm ih a ṭap ciamco.
A ṭap a ngui ih, na hmai ah mi in acid an lo burh a si hi, na hmai a kang thluh, na mit, na hnar le hmur pawl an kang thluh a si hi, ka fa duat, tiin I sim.
Ka zanmang men a rak si lo. Ka hmel a um nawn lo. Ziangruangah so ka parah hivek an tuah duh si pei? Fala pangai tak, mi tlaitluang tak ka si ko si maw. Ka tlawngkaipi pawlin ca thiamlo nu tiih hnihsuah sainak ih in hman hmanah zianghman ka sawn bet dahlo. Mi tawh hrimhrim ka duh lo.
Hmaikhat te ah ka thinhengnak cu ningzahnak in a run luah, ka tlangval pa in sizung ih ka ihkhun ah I ra veh. Ka hmu thei si lo, ziangtluk a hrangah hmelsia ka si ding ti ka theiaw zet, cumi in I ningzak ter.
Na dam maw? Tiih I sut. Asinan a ṭawngkam cu I ngaihsak hmel lo nasa khi a bang. I mitkem le fihnak ṭawngkam a ṭawngmi tla malte ka thei phah. Cubet ah keimah veh ih ra hman si loin ka umnak ward ah duty a ciah ruangih ra men fang khi a si. Reilote hnu ah I fehsan lohli sal.
Tuvekih ka riahsiat hi a um hrih lo, sup aw theiloin ka ṭap suak. Ka mitthli cu ka taksa vun khui tawk hmun tak ah si maw an li kiangki ko ding.
Cumi ni ah Palik pawl in ka umnak ah in ra veh. Ka parih thil cangmi simfiang dingin in sut. Tuihlan ah ral ka neih le neih lo le, mi pakhat khat hringhro tu ka neih dah le neih dahlo pawl in sut. Zohman ka neih lo thu ka sim hai.
Asinan kum 2 lai liam zo ah khan, ka tlawngkaipi hlun pakhat cun “ralring aw culo asile, acid thawn ka lo burh ding hokhaw” tiah I rak hringhro dah. Kum 2 lai a liam zo nan, thupi tukah ka rak ngai lemlo. Cu nu cun Lewis thawi kan ngaizawn awk ruangah I rak thik tuk.
Ka umnak London khawpi ah hin, acid burh ih khat le khat doawknak hi midum pawl le muslim pawl lak lawngih laar zet a si. Asinan kei cu Mirang rori ka si fawn, ka nulepa cu Irish cithlah an si fawn.
Zarh khat zingzawinak an neih hnu ah, palik pawl cun thudik an thei suak ngah. Tuihlan kum 2 lai ah acid ka lo burh ding tiih I rak hringhro dahtu ka tlawngkaipi hlun cun ka tlangval Lewis ka theihlo sungah a rak thlem rero. Asinan ka tlangval in I ṭhen duh cuanglo ruangah cu nu cun a unau pakhat cu paisa 200 pe in ka hmai ah acid a burh termi a si. Palik pawl cun ka hmai ih acid I burhmi vek cekci cu a unau pai kawr ah an hmu.
Palik pawl cun cupai’ phone sungih GPS an zohsak nak ihsin khami zan kha vanduai ka tawnnak kiangte ih a rak um an hmu ngah.
Cui thubuai cun thla tawkfang zet can a luah. A unau pal cu ka hnen ah ngaidam a dil duh le duhlo thu an sut tikah a ṭap ciamco ih ka tipalh a si ti lawng a sim. Cubet ah a ṭah-aw khal tiawter menmen a si. Acid I burhnak san cu suanlam dang a hawl ciamco. A nulepa in an duh loih an ngaihsak lo thu, sumpai a mamawh tukih pound 200 a cousin farnu in a pek dingmi thawn leiba a rulh thei ding thu pawl suanlam a hawl ciamco.
Cui a suanlam pawl cun amah mitkemnak a suahter sinsin men. Thuṭhentu khal in zohman in a thuphan permi an ngai paih nawn lo thu, ṭawng nawn lo dingin a sim.
A tawp ah cun an pahnih in kum 20 veve thawngthlak dingin an thu ṭhencatsak an si. Asinan ka nun damsung ka tuar dingmi, ka hmel, ka mit le ka hnar pawl in tisiatsakmi thawn tahṭhim cun a nep tuk deuh lo sawm? Cubet ah thawnginn sungah nunlem hmangin an ṭha awter tla a si sapbai ahcun tuan deuh ah an suak thei bet.
Tawkfang reilote hnu ah acid burh dingih a cousin unaupa fialtu, ka tlawngkaipi hlun cu thawnginn ah ka va leng. Tawnawk cu a nuam lo nasa. Hmatawn ih a hmel zoh dingin mit ka nei nawn fawn lo, kan ti theisun cu biakawk lawng a si.
Ziangruangah ka parih hivek thil ti a si thu ka sut tikah, anih cun ka mawinak I rak nahsik thup ringring thu I sim. Lewis thawi kan ngaizawn awknak cun a thinlung a rak kekkuai ter. Ka hnen ihsi a laksuah theidan umsun cu ka mawinak siatsuah lawng hi a si.
A tawp ah, a thil tuahmi parah pawi tinak a neih le neih lo thu ka suh tikah anih cun pawi a tithu le kum tluan in thawnginn sungah a hringnun ṭha takih a hman ding thu I sim lohli cih.
Aw, ṭhenkhat minung pawl hi anmai’ hamṭhatnak hrang lawng rori ruattu an va si take m timi ka vun theisuak ruangro. Ngaidam khal zianghman I dil lo riai. A thil tuahsualmi parih an kaihmi ruangah pawi a ti ih cu men lawng a si.
Lailantei’ ti ahcun ka parih thli thlengmi ka ruah rero tikah keimahte ka thinheng zet ṭheu. Sualnak tuahtu pawl an hremdan hi mi an siatsuah natsat zia ruah in sullam ava nei lo lawmam em.
Ka hingnun ih harbik miangmo cu, zohman kawppi ka tawng dah nawn lo ding. Ka hmai hivekih siatsuah ka si veten ka tlangval Lewis khal keimah thawn pehtlainak a phit thluh. Hi thu ka ruah tikah acid ih in burhmi hnakin ka tuar a na deuh sawn ṭheu. Asinan cucun ka hringnun I siatsuah lo dingin ka zuam.
Ka nulepa cun ka feh suksonak I hruaitu dingah uico in leih. Ka uico cu ka duh nasa, ka tlangval hlun hnak hman in ka duh sawn. Tlangval neilo khalin ka duh ahcun mi dang bua hmangin nau ka pai thei ih fate ka nei thei thotho si. Tuihnu kum reilo ah leitlun thiamnak a sang vivo dingih ka sibawi khalin ka mit le ka hmel pawl khal an tuah ṭhasal thei ding ti cu ka ruahsanmi a si.
Asinan vanneih thlak zetin keimah vek mitcaw pawl hrangah hnaṭuan tampi a rak um ve. Tu ahcun sun ah call center ah agent hna ka ṭuan. Cuitlun ah ka paih thar zetmi deejay khal ka tuah phah thei fawn.
Kan hringnun cio ah riahsiatnak le thinpih vansan nak kan tawng cio ko ding ka zum. Ka mawhsualnak ruangah si riai loin mi pakhat cun ka hmai ah acid I burh.
Asinan hi ka thil tawnmi in ka hringnun ka siatsuah ter asi ahcun keimai palh a si ding. Curuangah si phuba ka lak duhlonak cu. Asinan palik pawl le thuṭhentu theih ding ah hivek sualnak tuahtu pawl hi an sual vekih hremnak pe dingin ka fawrh duh. Ziangruangah tile tui dinhmun ah UK ram ah hin acid thawn mi burh hi a laar nasa ih, cuvek sualralnak tuahtu pawl le nauhak kum 10 hman tlinglo tete an si fawn.
Ka thuanthu in rak ngaisak ruangah ka lungawi. Nangteh keimah vekin na hmel hloh thluh in mitcaw ah cang bang awla ziangtin na hringnun na hmang ve pei?
Video rak zoh aw;’
Noted: Hithu hi Audio in tuahsawng siseh, website dangih post sawng kan sianglo.