US President Cuhawknak, America Cawkbuaitu Muslim MP 2
#US President Cuhawknak Thuthar: 2020 November 3 ah khin America President hrilawknak cu neih leh a si ding. Democratic lam ihsin cuhtu 20 an lut zo ih netabik ih luttu Vice President hlun le 1984, 1988 ih President rak cuh zotu Joe Biden cu duhtu an tambik. Democratic lamah cun a laihawl bik dingih zum a si. Democratic President cuhtu tamsawn cu Radical Left/ Far Left an ti ih keh lamah an tlan tukih ruah an si. An auhla hrekkhat tla cu: America Electorial Vote ṭhiah ding, thawngtla le misual nunrawngpawl khal vote pekter ding, ram mi si lo khal vote thlak ter ding, kum 18 si loin kum 16 vote pekter ding, Green New Deal an ti ih vanzam, mawṭaw, tlangleng tivek khal hlawnhlo thluh ding, leitlun hrin dildel ih tuah ding, hi ruangah New York ah tla cun thlaihring tuam cih Humbager tla an kham zo , Midumpawl sal an rak si man rulhsal ding” tivek a si.
Tawka hur le Muslim tivek kha hmun ṭha pek ding hi an fehdan a si. Cun Globalization an ti ih leiltun hi acozah pakhat, biaknak pakhat, nunphun hmunkhat thawn feh ding an ti. Joe Biden naihbiktu Bernie Sanders asile kanmai Ne Win ih Socialist thawn ram hruai a tum. Hipawl hi Joe Biden cun a aupi lo. an relbik sawn cu a tar tuk kum 76 a si zo, nunau tham le kuah a hmang, a fapa China thawn sumtuahnak thuk tak an nei tivek a si. Anih hi Trump a neh thei men ding tiih an ruah a si ih President cuh dingih a phuan ni ah Fund 6.3 million a ngah.
#Jesu Palestinian a Si Maw? – America Politics Cawkbuaitu Pathum: America Tlangsuakbu ah khin Muslim, Bhuddhist, Hindu le Sakhaw nei lo tivek an um hnuaihni. Tu ah Democratic Congresswomen thar pathum hi anmai party in siseh, rampi khalin an buaipi zet. Cupawl cu Ilhan Omar(Minnesota), Rashida Tlaib (Michigan) le Alexandria Ocasio-Cortez(AOC) (New York) pawl an si. Anni pathum hi US ramkhel khawvel an tibuai thei zet. Upa le mi hmaisa upatnak le thulunnak le pakhat hman an nei lo. Bible thawn in thutiam lak khal an duh lo ih Muslim Koran thawn thu an tiam.
AOC hi Socialist a si ih Green New Deal an ti thlai hring ei lo ding le khawl thil hmuahhmuah deuhthaw hnawl dingih aupitu a si. Ms.Tlaib hi Paletinian miphun a si ih Israel le Israel parih America lungput a sawisel ti lo cu a ziaum deuh. Ms. Omar hi Somalia miphun a si ih thubuai le si lo lutuk a rel ngun nasa. Hriltlin a si theinak khal a umnak District ah Obama san laiah Muslim 70000 an umter ruangah ti a si. Hitler in Juda mi 600000 leng lo a thah khal kha , ‘phuah cawp’ men a ti thul.
American mi tampi cu Benjamin ah an buai a ti. A umzia cu Israel PM Benjamin Natanyahu parih an rinum a ti. Hi hi an sawisel cece. An party ih dem dingin an phut nan, khi a hawipi pahnih in an ṭan ruangah an dem thei lo. Cumi cu remcangah lain President Trump in, “Democratic Party cu Isareal dodal(Anti-Semitic) party an si” a ti tikah an thiamthu an rel ciamco. 2001 kumih WTC Innsang Osma Bin-Laden hopawlin vanzam thawn an sut khal kha, “America zo si maw tuah mi a si” a ti. Cunt u netabikih a ṭawng mi mak zet cu, “Jesu kha Judami a si lo Palestinian a si” a ti. Mak roh la. A si ringawt mai!!
#Trump A Dingkhawng Thlang: Robert Mueller Report a suah ih 2016 hrilawknak ah Russia hnamhnawihnak a um lo ti le Thuṭhennak a kham lo ti a lang hnu khalah Democratic luban hrekkhat cu an dawithlun vivo ih President ihsi hlawn tarori an tum. Ahleicein House Judiciary Committee Chairman Nedler le House Intelligent Committee Chairman Adam Schiff pawl cun hlawn thotho dingin an au. Hi hi Republican lam cun an sawisel nasa. Hi Committee pawl hin Trump hawipipawl, acozah lubanpawl, sungkua unaupawl, a sum retnak bank tiang thusuh ih a diklonak hawl an tum. Cutikah Trump cun acozah lubanpawl, insangpawl le a hawipipawl cu zohman Hluttaw Committee in an kawh khal le feh lo dingin thu a pe hai. A san cu Mueller in a zingzawi laiah ṭhaten kan ṭuanpi ih a rizal a suak zo a ti ve. Hi hi a dik.
Trump hin hlawn tum khal sehla an hlawn thei lo ti a theih ve tikah an thu a thlun duh lo. Tu cu Trump dodaltu acozah hnaṭuan sangpawl khal an bang vivo thlang. Deputy Attorney General Rod Rosentein khal a bang ta. Cun an kawh vekih Trump milai an feh duh lo ruangah Demoratic Presidential Candidate larbik Joe Biden, Speaker Nancy Pelosi pawl cu Trump hlawn ding rel thawk a ṭul ding an ti ve. Asinan Senate lamah cun Democratic Senator hrekkhat cun Trump hlawn an dodal thu an rel ve.
A san cu hlawnnak khawp sual a tuah lo hleiah an hlawn thei cuang si lo dingin 2020 hrilawknak ah an tuar sawn an phang. Senate Judiciary Commiittee Chairman Lindsay Graham cun, “Trump in Mueller hlawn a rak tum dah timi cu Thuṭhennak dodal a si lo pi. Mueller a hna ṭuan a ṭhehter a si si. Kham a tum dah ti cu a kham tinak a si lo” a ti. House in Trump an hlawn tum cu Senate Republican pawlin an ṭuanpi tum lo ti a fiang a si. Trump hlawn ding cun Senate 100 ah 67 tal a ṭul. Tu ah GOP 53 Democratic 47 an si. Jed Zuala Cawnghlut
Ref: World News. Photo: Ohmar, Tlaib & AOC