UN Sungțuan Bawmtu Raltlan Vehvai An Siang Lo

Rakhine ramkulh Sittwe khawpi thlengtu UN sungțuan bawmtu Ursula Mueller cu siannak a ngah lo ruangah Rakhine raltlan pawel hmunkhuarnak ah a feh ngah lo thu theih a si.

“Rakhine ramkulh sungih AA le ralkap do-awknak ruangah a tlantu pawl hmunkhuarnak feh dingah a hleice in a duh zet, feh dingin siannak khal a dil, asina’n humhimnak lam thuhla ruangah feh an siang lo, curuangah feh a theihnak hmun pawl lawng a feh” tiah UNOCHA in May 13 ah Media pawl hnenah simnak an nei.

Ursula Mueller cu Rakhine ramkulh sungih AA le ralkap karlak do-awknak ruangih a tlantu mipi 30000 lenglo an kim ih, cu pawl hnenah feh in tonkhawmnak a nei ding tiah thuhla a rak leng dah. Sittwe khawpi ih Muslim raltlan hmunkhuarnak lawng a feh ih raltlan pawl thawn tonkhawmnak an nei.

Ursula Mueller ih khualtlawwnnak ahhin Rakhine, Kachin le Shan ramkulh ih mipi pawl nun dan le zatlang pawlkom ih hnațuan dan dinhmun pawl cu amah rori in hmu thei dingah tumtahnak a neih thu UN in tlangthannak ah an tarlang. Ref : NRJR