COVID-19 Ruangah Facebook Cun A Hnaṭuantupawl Thla 6 Bonus pe ding
Facebook Company cun Coronavirus ruangih hnaṭuan cawltu Facebook staff pawl Thla 6 hrang bawmnak pe ding
Coronavirus ruangah Facebook company pi khal full-time in Facebook company ih hnaṭuantu mipum 45,000 pawl cu an cawl ve ruangah, himi an cawlh sungih an ṭul-hai le mamawhmi ih hman dingah tiin thla 6 ta an bonus pek an si tlun ah minung pakhat $1,000 ciar pek dingin Facebook CEO Mark Zuckerberg cun official in a puang.
Full-time ih ṭuanlo, contract ih ṭuanpawl cu thla 6 bonus hi pek an si ve lo ding, asinan, an hlawh cu felfaiten pek a si ding tiah a sim. “Mi tampi cu an fale kilkhawinak hrangah ni tam le can tam an mamawh ding ti kan theihthiampi tuk, curuangah hivekin kan tawlrelnak a si” tiah Zuckerberg cun a tarlang.
March 5th 2020 ah khan Seattle headquarters ih contractor hnaṭuantu pakhat cu Coronavirus a kai ngah ruangah khar a si. Facebook company cun a hnaṭuantupawl cu an mah le an inn ciar ihsi a ṭuanter nak hi zarh khat lenglo a si zo. Mizansun (March 18) tiang ah leitlun huap in Coronavirus ngahtu 197,000 lenglo an um ih, mi 7,000 lenglo an thi zo tiah official in a puang. Nitin in mithi le mina a thleng danglam aw ringring.