Mizoram, Aizawl ah COVID-19 Natkai An Hmusuak

Tufang leitlun pumhuap in a buaipi bikmi COVID-19 natnak cu Mizoram khalah a lut ve thlang. Aizawl ih um mipakhat hnen ah COVID-19 natnak an hmuh thu Health Minister Dr. R. Lalthangliana cun tuisun (March 25) ah mipi hnen ah simthannak a nei. Natkaitu pa hi Zoram Medical College, Falkawn ah enkawl a si.

COVID-19 nathrik kaitu Mizo pa hi March 15, 2020 ah khan Netherlands ihsin Mizoram ih ratlung a si, March 24, 2020 ah COVID-19 natnak a nei a si timi hmuhsuak a si thu, acozah cun official in a tarlang.

Mizoram Health Minister ih simdan ah COVID-19 nat kaitu pa hi Mizoram sung ihsi a ngahmi siloin ramdang ihsin a run phurhlutmi (natnak kai cia in a ra tlungmi) a si tiah a sim. Natnak neitupa hi mithiam tak, Pastor a si ih, midang kai sawng lo dingin amah le mah kilhimawk thiam a si ih mipi hrangah thlaphan tuk ding a um lo tiah a sim bet.

Natnak neitu ih sungkua pawl khal a hrante ih enkawl dingin Zoram Medical College lam ah fianhrial ten ret ṭhat thluh an si zo thu theih a si.

Natnak neitupa hi March 18 ah khan symptom a lang ih a khua a sik thawk, Netherlands khawpi Amsterdam ih a um lai ihsin damlo cia a si ih March 22 ah khan sibawi in an veh ih a natnak check fel a si tikah mizan ah khan confirmed a si timi an hmu suak.

Vanzam ih a fehpimi pawl khal an zaten natnak check fel thluh an si ding tiah Director of National Health Mission, Doctor Eric Zomawia cun a sim. ~ Vanlaini