Malaysia COVID-19 Boruak That lam a pan thei lo; ralrin tul

Chin mi tampi umnak, Malaysia ram cu COVID-19 nathrik in nasa takin a tuam ih tuisun (March 26) tiang ahcun ṭhat lam hnakin boruak a sosang sinsin lam. March 18, 2020 ihsi khan acozah cun thusuah tuah in zohman lengsuah ngah lo (Lock down) mah le inn ciar ih um men dingin thusuah a tuah.

Fimthiam zirnak Tlawng siseh, biaknak lam ih Biakinn le anmah Muslim biaknak ih Zirtawp ni tinten thlacm khawmnak an neihmi pawl khal phih thluh a si. Acozah lam in thusuah an tuah hmaisakmi ah March 18 – 31 tiang ti a si nan, COVID-19 nathri hi ṭhatlam pan loin nat ngahtu an pung vivo ruangah April 15, 2020 tiah lock down ni an ṭhan bet.

Malaysia ramsung ah COVID-19 nat ngahtu hi an pung sinsin ih, March 24 sun ah khan mi 106 in an ngah, March 25 sun ahcun mi 172 in an ngah bet, tuisun (March 26) ah mi 235 an pung bet. Malaysia ramsung ih natnak neitu zaten mipum 2,031 an si ih, dam khawsuak hi mipum 215 an si ih, COVID-19 ruangih thi mipum 23 an si. Himi hi March 26 sun ih thuthang a si. Ni dang ah a thleng danglam aw thei.

Laimi tampi umnak ram asi bangin suahsemnak khua le ram ih a umtu in siseh ram ṭhasawn a thleng zotu pawl khalin Malaysia ih umpawl zawnruah seherhnak tla an nei zet. Mi ṭhen cu Ni-ca ih hnaṭuan an um ih mi ṭhen cu thla hlawh zawngih ṭuan an um. Ni-ca ih ṭuanpawl ruah an harsa hleice, Ni 29 sung rori hnaṭuan lo, sumpai ngahmi um loin inn ih erh tarawk ding a si.

Mi ṭhen khat, kiangkap naivai ih dawr umlo pawl tla cu ruah an har zet, malte leng suahvah tikah palik in duty ringring a si tikah, leng suakvak pawl cu paisa cawh a si fawn si, ngaihtuah an um zet.

Hi COVID-19 thawn pehpar in Malaysia ih a ummi Laimi pawl in kan theih dingih thupi zet cu, acang thei tawkin harhdamnak hi ngai thupi cio sehla. Cun ṭul mamawh tuk ruangih leng suah duak ṭul pawl khal ralrin natsat a ṭul. Palik ih kaih ngahmi an um hnuaihni ih paisa an cawhmi khal an um. Kan umhmunte ciar ah thlacamnak thawn ralring ten kan umtlang cio kei uh.