Chinram le Mizoram ah nasa zetin Linghnin

India le Myanmar karlakih um Mizoram le Chinram cu tuizing, June 22, zinglam nazi 5AM hrawngah nasa zetin ling a hnin thu theih a si. Linghnin ih natsat zia hi Magnitude 5.8 ih cak a si. Mizoram le Chinram ramri ih umpawl ahleice in an tuarna cuang.

Mizansun lam ah khan Mizoram Aizawl district sungah Lat:23.80N & Long:92.96E in leilung sung 35km ihsin Magnitude 5.1 in a rak hnin thawk rero zo. Hi Linghnin hi Mizoram Champhai district Khawbung khua ihsin 5km hrawng ihsin hninmi a si.

Kan Chin ramkulh Ṭio khua le khawte Dangdang khal nasa takin a hngawr thu theih a si. Ahleice in Mizoram ri Ṭio (Khawmawi) hi a bese cuang tiin an sim. Falam pengih khawte hmun tampi ah an tuar ve nasa nan, Mizoram Champhai district le ramri ih Ṭio khua pawl hnak cun zia um deuh in an sim.

Hivekin Chinram lole Mizoram ih linghnin bese zet hi theihban cin ah a rak um tuk lemlo. Tuiṭum hi a bese zetih Mizoram le ramri (Ṭio khawmawi) lam cu inn le Biakinn khal an khing ṭeuhṭeuh ih tuk a sum zet.