Nitin kan umtlan dan; Pathian duhzawng ih Nun

Zumtupawl nitin kan tlanlennak le Kawhhran ah siseh pawlkawm tete ah siseh a thupi bikmi cu Pathian duhzawng ziang a si timi hi kan theih a mamawh bik. Tangdawr nun hi a thupi bikmi le Pathian ih duhzawng a si. Himi thu ah kan dung naite ih Saya Lalte ih sim mi kha kan thei thluh ko ding, Kawhhran a buai ṭheunak bikhi, kan nih cu kan kut a tung zawngin kan zoh ih, President a sangbik, cutin kha tin kan timi hi a si. Pathian hnaṭuannak khalah a sangsawn le a niam sawn timi hi a um lo. Bangran thluh kan si. Pathian hna kan ṭuan thei timi sawn hi lungawi ih lam rero ding kan si.

Dungthluntupawl hi kan zohṭhim ding tha zet an si ko. Hotu, hotusang, sungṭuan tivek in an ṭhen-aw ciamco cuang lo.

Kan tuan lo asile a ṭuantu ding an tam tuk. Pathian hnaṭuan ih aihram tuk tla hi khat lam ih ruah ah a ṭha tuk lem lo, tiah an sim ka thei theu. Pathian hnaṭuan hi a cuh ih cuhawk lam ding khi a si. Example kan lak dingih ka duhmi cu, Elijah kha, Zezebel in that dingin a dawi ih hmun ṭhing ih a um lai ah, Pathian hnen ah na Profet pawl an that thluh keimah pakhat lawng ka tang a ti, Pathian in ziang a ti? Baal milem hmai ih kun dah lo minung 7000 ka nei lai a si a ti kha. (Kan Falam bible ah fiang fukfi in a ngan lo ih, Mirang ahcun : Yet I have reserved seven thousand in Israel, all whose knees have not bowed to Baal, and every mouth that has not kissed him.”) “Israel ram sungah minung 7000 ret hranmi (reserved) ka nei a si, an nih cu baal khawzing hmai ih kun dah lo le an hmur thawn baal khawzing hnam dah lo an si.” Tiah a ti.

Hngalnak Pathian in a duhlo. (Ezakiel 28:17)

Hngalnak hi Pathian ih huatbikmi a si. Minung hi ziangruangah kan hngal timi cu a san le a vang um loin hngal a theih lo. Ṭhimnak ah, paisa tampi na neih ruangah tla si thei, na mawi ruangah tla si thei, cathiam sang na si ruangah tla si thei. Mitu ih Bible kan siarmi ah Lusifer cun a mawinak a hngalpi a si. Zumtu unau nangteh ziangha hngalpi mi na neih? Na lennak maw, mi ai ih cungcuang deuh na si nak maw, sinak sang deuh na neihnak maw, na hngalpi pang maw? Mi mawi cu mi sia pawl lakah an hngal ṭheu, cuvek ciah in milian khal farah pawl parah an hngal, sinak sang neipawl khal dinhmun niam deuh nei pawl lakah an hngal ṭheu. Pathian in a lo thlawsuahmi lennak si maw, mawinak si maw, sinak sang deuh si maw khan a hngalpi ih na hnakih niam deuh pawl hmuhsuamnak le Hngalnak ih na hman pang ahcun cucu Lusifer ih mizia a si. Pathian in a lo namthla tengteng ding, a rei maw a bat ti men.

Pathian duhzawngih kan um theinak ding ahcun, Zumtu nang le kei cun nitin Vanram le Hellram hi ruat ringring sehla, Hellram kan ruah asile Pathian thinheng tihnun zia kan thei ringring dingih, Vamran kan ruah asile Pathian ṭhatnak le zangfahnak kan thei ringring ding a si.

Mi tampi in kan ṭhelh pang maw ka ti ṭheumi cu ziang a si tile, tahṭhimnak in ka run lo ruah hmaisa ding, ka Pa ih tilh I fialmi le nuncan I sim vekin um loin, ka Pa ih thu khal lunglo, keimai duhdan dan in nung sehla, cule thil ṭul hai ka neih tikah ka Pa va dil hnik sehla siang zetih I rak leih cih mei ding nan zum maw, kei ka zum lo lawlaw. Ziangah tile Ka pa, A thusim ka lung lo ih a duhdan khalih ka nun lo ruangah a si.

Zumtu unau, nitin kan nun ah Pathian duhdan in kan um maw, taksa thianhlimnak lam khalah siseh Pathian lungawi zawngin kan nung maw, Kan duhmi phunkim cu ka dil ngam sapbai ti au law.. Patihan ih duhdan hman ih nung loin Pathian hnen ah kan dilmi cu Pathian hin in pek nan zum maw? Bawipa kan UN in tluangter hram aw, Cumi in pe aw, kha mi in pe aw, kan ti. Asinan kan mai lam in teh Pathian duhzawngin kan um maw, timi kan check aw fel kei uh. Pathian thlawsuah dawng ding cun kan mai’ lam ih kan tuah ṭuannak a tel ve hokhaw. Rundamnak ahcun kan nih ti lam pakhat hman a um lo, kan ṭhat ruangah le kan fel ih kan thianhlim tuk ruangih rundam kan si lo. Zangfahnak liolio a si.

Pathian thu ih um cu thlawsuah dawnnak a si. Luke 11:28 “Jesu cun, Pathian thu a thei ih a thlun taktaktu pawl cu mi thlawsuak an si sawn, tiah a ti”