Pathian Thuthang tha sermon; Zohthim tlak mino
Mi piangthar Pathian fate cun Pathian rundamnak kan co ngah veten thil pahnih tuah tengteng dingmi kan nei. Cucu ziang asi tile kan nunhlun, sualralnak le bawrhhlawhnak tlansan ih nunthar ih nun, hi te pahnih hi an si. Tlansan ding le pawk hnget ding tiin kan tuah tengteng ṭulmi a um.
Mi piangthar Pathian fate ciocio khal ah Mino hi ralrin ṭul hleice le fimkhur zetih nung ding kan si. ziangah tile mino cu thlemnak tawn a awl cuang. kan Bible hin hmun tampi ah in sim. Thusimtu lam kan zoh khal asile Bung 11:9 ah kan No lai can ah nawmawk ding, thinlung duhnak le kan mit ih ṭha le dik kan timipawl tuah ih nuncan ding thu pawl ah, nasa takin ralrinnak a pek thu kan hmu thei. A cemnet ah ziang a ti ti asile “Asinan hi pawl hmuahhmuak ruangah Pathian in thuṭhennak ah a lo thlen leh ding ti kha thei aw” tiah a ti. Ṭih a nunzia.
Mi tampi in No lai can ah duhduh in an nungcang, khawvel ka cen ta kei ka upat hnu in Pathian lam ah ka pe aw ke tla an ti ṭheu. Hi tawkih Thusimtu ih sim mi theifiang hai sehla cu cuvekmen ih an um ding cu ka zum lo lawlaw. Ngaingai tei kan sim ahcun kan No lai can ah thil ṭha tuah ding a tam tuk. Tuah cawk lo a si. Curuangah thil ṭhalo tuah le nuncan ṭhalo ih nun hi kan bansan rori a ṭul. Thil ṭha tuah ding a um lo asi hman ah thilsual, thil ṭhalo cu tuah hrimhrim ding kan si cuang lo.
Lennak le Fimnak thawn a khat mi Solomon siangpahrang cun Thusimtu sungah hitin a sim, a Bible ca rori ka run siar duh. Thusim 12:1. Kan no lai le ṭhatlai can ih Pathian kan theih ding a thupit zia. Ṭhimnak ah mi satliah le kan rualpi tivek men ih in sim mi sisehla cu kan tuah paih lo ih kan zum paihlo asi khal le ziangti ṭha. Asinan Fimnak le lennak thawn a khat mi Solomon siangpahrang hin a rak thei neknek tuk zo khi si.
Tuizan ih ka Bible cang thlan mi kan zoh asile Mino thawn pehpar in Paul khalin nasa takin a sim/fawrh ve.
Ahnuai lam Cang 10 nak kan zoh asile kan No lai, kan cah lai can hi zianghman lo men, reilote sung men a si ruangah, nuncan ṭhalo le kan thinlung duhnak, kan mit ih duhnak ih kan nun le kan tuah asi ahcun thuṭhennak kan tawn ding ruangah hitin a ti, “Cuiruangah riahsiatnak cu na thinlung ihsin ṭhawn awla na taksa ihsin thil ṭhalo cu hlawnhlo aw” tiah a run simfiang. Hiti ih a run sim mi hi, a tlun lam ih a sim mi, kan No lai can ah duhduh ih nungcang le thinlung duhmi kip tuah, sual phunphun tuah ding in sianglo tuk ruangah a si.
Sualrualnak a phunphun, thlemnak a phunphun in mino hi a neh awl cuang tiah zingzawitu pawl cun an sim. Mino nitin kan nunnak ah sualralnak in thlen theitu ding thil pawl hi a hrial hna kan thiam a thupi tuk. Mino hi mankhung tuk kan si ruangah Setan in a duh cuang, sualnak in naih duh cuang, cutik ah nitin kan nunnak ah kan ṭawngkam, kan nuncan ziaza le ziangkim ah mi ih nautat lo dingih nuncan kan zir le kan ralrin ding a thupi tuk lawmam.
Minung kan si sungah itsiktu, dodaltu, huatu, relsetu cu kan nei tengteng ding, cuvek neilotu cu minung an si lo tinak. Sualnak mithnawm tiat hman neilo Bawi Jesu hman an that rori a si kha. Curuangah kan Bible siarmi ih kan hmuh vek khan, Mino nitin kan nunnak ah Ṭawngkam siseh, Umtlandan, duhdawtnak, thlarau lam ah siseh, rinnak le thianhlimnak pawl khalah sisehla zumtu unau pawl ih zohṭhim dingih nung ding kan si zia fiang zetin in zirh.
No lai ah ṭawngkam tla thlahdah a awlzet, rinsanawk laifang ahcun cakbik ih neihawk a awlte, mi ih pawrh le lawm can ah thiambik le sibik ih neihawk pang a awlte. Cupawl lakah kan nih Pathian fale Mino cun ziangkim sunlawinak, riahsiatnak, ninghannak, beidawnnak, a sia a ṭha kan tawn ah Pathian hnen ih tlukluh ta rori hi kan tuah dingmi a si. Cu lawngah “Zohṭhim tlak Mino” kan si thei ding.
Keimahte ka ruat ṭheu, Nauhak lai te ihsin Pathian ṭihzah ih Pathian thu vekih a nungtu pawl hi cu Pathian lung an tawng zet ding tiah ka ti ṭheu. Nauhak lai ihsi Pathian thu vekih a umtu Miropi lo an um lo. Prophet Isaiah, Mawsi, Samuel, Timothy ..an tam tuk. Curuangah Pathian hin kan No lai can hi dik le fel le Amai duhdan le Amai’ lam ih kan tlukluh ding hi in duhsak tuk ngaingai a si.