Myanmar ram ah Pa le Fa an thataw Rumro

Mague ramțhen Myotit peng Palingyi uksuh Ti-pyin khua ah April 12 zaanlam suimilam 9:30 ah pafa cu țongkam an el aw ih fapa cun nam thawn a pa a dawh that tiah theih a si.

Thilcang dan cu Ti-pyin khua ih um U Htay Maung (kum 45) cu an inn ah a fapa Chit San Aung (kum 15) thawn țongkam an el aw ih U Htay Maung cun a fapa cu thlalang khuat in a den ruangah a fapa Chit San Aung cu thinheng tuk sup thei loin a pa cu nam saupi thawn veihnih a dawh tiah theih a si.

U Htay Maung ih upa U Htay Aung cu a tunu in thuhla a sim veten a hmun ahcun a thleng ih U Htay Maung cu inn tlunta room ah nam hriamhma thawn a ril ih a tupa Chit San Aung kiangah nam saupi thi kop zelzel in a hmuh thu theih a si.

U Htay Maung cu Myotit siizung ahcun an fehpi ih suimilam 10:30 ah Siibawi pawlin an zohfel ih U Htay Maung cu a vorhlam hnak letmah pakhat thuk hriamhma pakhat le a vorhlam hnak hnuai letmah pakhat thuk hriamhma pakhat thawn a thi tiah an hmuhsuah thu theih a si.

Hi thuhla thawn pehparin Chit San Aung (kum 15) cu April 13 zinglam suimilam 2:30 ah police second lieutenant Yin Wai Phyo in Myotit palik zung ah thubuai a tuah. Myotit palik zung cun Chit San Aung cu (ပ) 207/2019 yazatetgyi pukmah 302 in case an tuah ih police captain Shwe Sein in case thawn pehparmi thuhla a zingzoi rero tiah Myotit palik zung ih țuanvo neitu pakhat in simnak a nei. Ref : Mizzima