Titoih Thok Ni Ah Highway Ahhin Motor Accident Vei 4 An Um

Yangon – Mandalay highway ahhin Kawl kumthar titoih ni ah motor accident vei 4 a um ih minung 13 hriamhma an tuar tiah theih a si.

April 13 zinglam suimilam 2:20 hrawngah Mandalay – Naypyitaw highway peng thuam 193/3 – 193/4 kalrak ah Ko Soe Moe Naing ih mawnmi Nissan motor cu a dungih thluntu Moe Thet Aaka motor in a pah. Moe Thet Aaka motor totu cu hriamhma tuar an um lo na’n Nissan motor totu minung 8 (nunau 4, mipa 4) in hriamhma an tuar. Hi thuhla thawn pehparin motor accident cu pukmah 337/338 in thubuai tuah a si.

Cuvek thotho in zinglam suimilam 4:00 hrawngah Yangon – Naypyitaw highway peng thuam 111/2 – 111/3 karlak ah Shwe Sin Sin Kyar Express cu zamrang tuk ih a feh ruangah control thei loin hmailam ih rak cawltu Pho Chit timi lam (ဇာတ္အဖြဲ႔) pawlkom motor Mandalarmin Express cu a pah.

Mandalarmin Express in Wish motor black colour an pah bet ih Wish motor black colour in Passo motor black colour a pah sin tiah highway palik hnen ihsin theih a si. Hi motor 4 pah sin-awknak ruangah Wish motor totu minung 7 sung ihsin mi 2 in hriamhma an ngah. Shwe Sin Sin Kyar Express motor mawngtu Ko Kyaw Lwin Oo cu thubuai tuahsak a si thu theih a si.

April 13 zinglam suimilam 6:00 hrawng khalah Yangon – Naypyitaw highway peng thuam 172/2 kiangah Atavan white colour motor mawngtu U Aung Win Htun in a mawnmi motor ciang lo thawnvang cu thei in lamzin sir ah a cawl ih motor totu U Win Myint Aung cu motor ihsin a lengih a suah zawngah motor pakhat in a rak pah.

Mi pahtu motor cu a tlanhlo thu, pah tongtu U Win Myint Aung cu a lu thisen suak in hriamhma a tuar thu highway palik hnen ihsin theih a si. Hi thuhla thawn pehparin highway palik a simi Tharkarah palik zung in U Win Myint Aung cu Sua siizung ah an phur cih ih mi pah tahratih tlanhlotu khal lamzin phit ih a zinzoi tikah white colour motor pakhat cu rinhmai a um ruangah thuhla an zinzoi rero thu theih a si.

Tuizing thotho April 13 suimilam 7:15 hrawng ahcun bike Naypyitaw – Mandalay highway peng thuam 327/7 – 327/4 karlak ah light truck pakhat cu a kehlam dunglam ke a thlong ih vorhlam lamzin laifang ahcun a let tiah highway palik in tlangthannak a nei. Hi motor let ruangah motor totu minung 9 sungin minung 2 in hriamhma a tuar ih hriamhma tuartu mi 2 cu highway Pyinsii palik zung ih palik pawlin a bom thu theih a si. Ref : Mizzima